سیب: قدرتی طاقت کا خزانہ ‘ دل، ہاضمہ اور صحت کا محافظ

ماہرینِ صحت کے مطابق، سیب ایک ایسا پھل ہے جو صحت کے لیے بے شمار فوائد رکھتا ہے۔ یہ غذائی ریشے (فائبر) اور اینٹی آکسیڈنٹس سے بھرپور ہوتا ہے جو جسم کے کئی نظاموں پر مثبت اثر ڈالتے ہیں۔

 باقاعدگی سے سیب کھانے سے ہاضمہ بہتر ہوتا ہے، دل کی صحت مضبوط رہتی ہے اور وزن کو قابو میں رکھنے میں مدد ملتی ہے۔ ماہرین کا کہنا ہے کہ یہ پھل دل کے امراض اور ٹائپ 2 ذیابیطس جیسے دائمی امراض کے خطرات کو کم کرتا ہے۔

ایک درمیانے سائز کے بغیر چھلے ہوئے سیب (تقریباً 182 گرام) میں 94.6 کیلوریز، 4.37 گرام فائبر، 18.9 گرام شکر، اور پوٹاشیم و وٹامن سی کی وافر مقدار موجود ہوتی ہے۔

 سیب زیادہ تر پانی اور کاربوہائیڈریٹس پر مشتمل ہوتا ہے، اور اس میں موجود قدرتی شکر (فرکٹوز، گلوکوز، سوکروز) جسم کو فوری توانائی فراہم کرتی ہیں۔

ماہرین کے مطابق، سیب کا گلائسیمک انڈیکس (GI) 42 سے 44 کے درمیان ہوتا ہے جو کم سمجھا جاتا ہے — یعنی یہ خون میں شکر کی سطح کو اچانک بڑھنے سے روکتا ہے۔ سیب میں موجود پیکٹن فائبر کولیسٹرول اور بلڈ شوگر کو قابو میں رکھنے میں مدد دیتا ہے۔

اس کے علاوہ، سیب میں پائے جانے والے قدرتی اجزاء جیسے کوارسیٹن، کیٹیچن، اور کلوروجینک ایسڈ جسم میں سوزش کو کم کرنے، توانائی بڑھانے، اور خون میں شکر کی سطح کو متوازن رکھنے میں مددگار ہیں۔

 تاہم، ماہرین کا مشورہ ہے کہ سیب کھانے سے پہلے اسے اچھی طرح دھو لیا جائے تاکہ کسی بھی کیڑے مار دوا کے اثرات ختم ہو جائیں۔