متحدہ عرب امارات میں آن لائن خریداری کا نیا انقلاب ‘ اے آئی ایجنٹس خودکار طور پر خریداری کریں گے

متحدہ عرب امارات میں آن لائن خریداری کا نیا دور شروع ہونے جا رہا ہے، جہاں ویزا اور ماسٹر کارڈ نے مصنوعی ذہانت (AI) پر مبنی جدید نظام متعارف کرانے کا اعلان کیا ہے۔

یہ نظام صارفین کی اجازت سے خودکار طور پر محفوظ اور محدود خریداری انجام دے گا، جس سے آن لائن شاپنگ کا طریقہ کار مکمل طور پر بدلنے والا ہے۔

یہ نیا رجحان "ایجنٹک کامرس" کہلاتا ہے، جس میں اے آئی ایجنٹس صارف کی جانب سے خریداری اور ادائیگی کے تمام مراحل انجام دیتے ہیں۔

ویزا نے اپنے نظام کا نام "انٹیلیجنٹ کامرس" رکھا ہے جبکہ ماسٹر کارڈ نے "ایجنٹ پے" کے تحت یہی ٹیکنالوجی متعارف کرائی ہے۔

صارفین صرف ایک سادہ ہدایت دیتے ہیں، جیسے "بالی کا ٹکٹ بک کرو اور سوئمنگ سوٹ تلاش کرو"، اور اے آئی اسسٹنٹ چند سیکنڈز میں قیمتیں موازنہ کر کے ادائیگی بھی مکمل کر دیتا ہے۔

ماسٹر کارڈ نے یہ نظام مائیکروسافٹ کے اشتراک سے تیار کیا ہے، جبکہ ویزا نے مائیکروسافٹ، اوپن اے آئی، اور اسٹرائپ کے ساتھ مل کر اسے بہتر بنایا ہے۔ دونوں سسٹمز میں ڈیجیٹل ٹوکنز اور محفوظ دستخط کا استعمال کیا گیا ہے تاکہ صارفین کی معلومات خفیہ اور محفوظ رہیں۔

یو اے ای میں 99 فیصد سے زائد اسمارٹ فون استعمال اور 70 فیصد سے زیادہ ڈیجیٹل والٹس کے حامل صارفین ہونے کی وجہ سے ملک اس ٹیکنالوجی کے لیے ایک مثالی مارکیٹ بن گیا ہے۔

کلاؤڈ فلیئر کے تعاون سے ویزا اور ماسٹر کارڈ نے "ویب بوٹ آتھ" سسٹم بھی تیار کیا ہے جو ادائیگی سے قبل اے آئی ایجنٹس کی تصدیق کرتا ہے۔

ماہرین کا کہنا ہے کہ مستقبل میں عالمی ای کامرس کا تقریباً 20 فیصد حصہ اے آئی ایجنٹس سنبھال سکتے ہیں۔

یہ نظام یو اے ای کے صارفین کے لیے آن لائن خریداری کو پہلے سے زیادہ تیز، محفوظ اور خودکار بنا دے گا، جہاں آپ کا اے آئی اسسٹنٹ آپ کے اصولوں کے مطابق خود خریداری کرے گا۔