سبزیوں کو بھاپ میں پکانا یا اُبالنا؟ غذائیت کے لیے سب سے بہتر طریقہ کیا ہے

صحت مند غذا کے خواہشمند اکثر یہ سوچتے ہیں کہ سبزیوں کو اُبالنا بہتر ہے یا بھاپ میں پکانا۔ یہ معمولی سا فیصلہ بظاہر لگتا ہے، مگر دراصل سبزیوں کے ذائقے، رنگ اور غذائیت پر اس کا بڑا اثر پڑتا ہے۔

غذائی ماہرین کے مطابق سبزیوں کو بھاپ میں پکانے سے ان کا ذائقہ، رنگ اور وٹامنز خاص طور پر وٹامن سی اور بی کمپلیکس محفوظ رہتے ہیں۔

 پتوں والی سبزیاں تازہ اور خوش رنگ نظر آتی ہیں، اور تھوڑا سا لیموں یا جڑی بوٹیاں شامل کرنے سے خوشبو اور ذائقہ مزید بڑھ جاتا ہے۔

دوسری جانب سبزیوں کو اُبلتے پانی میں پکانا روایتی اور آسان طریقہ ہے، مگر اس سے زیادہ دیر پکانے پر وٹامنز اور معدنیات پانی میں چلی جاتی ہیں۔

اگر پانی کو سوپ، دال یا سالن میں استعمال نہ کیا جائے تو غذائیت ضائع ہو جاتی ہے۔ آلو، شکر قندی اور چقندر جیسی نشاستہ دار سبزیوں کے لیے اُبالنا مناسب ہے، اور باقی پانی کو ضائع نہ کر کے کھانے میں شامل کرنا چاہیے۔

’جرنل آف ایگرکلچرل اینڈ فوڈ کیمسٹری‘ میں شائع تحقیق کے مطابق بھاپ میں پکائی گئی سبزیاں اُبالی ہوئی سبزیوں کے مقابلے میں زیادہ اینٹی آکسیڈنٹس اور وٹامنز برقرار رکھتی ہیں۔ 

غذائی ماہرین کا کہنا ہے کہ بھاپ میں پکانا سب سے صحت مند طریقہ ہے کیونکہ اس میں نہ تیل کی ضرورت ہوتی ہے اور نہ ہی وٹامنز و منرلز ضائع ہوتے ہیں، جس سے یہ ذیابطیس، دل کے مریضوں اور وزن کم کرنے والوں کے لیے بہترین انتخاب بنتا ہے۔

ماہرین نے خبردار کیا ہے کہ بھاپ دیتے وقت سبزیوں کو زیادہ دیر نہ پکائیں، برتن زیادہ بھرا نہ ہو، اور پانی میں نمک یا جڑی بوٹیاں شامل نہ کریں۔ سبزیاں ہلکی کرنچی رہنی چاہئیں۔