عدالتی حکم کے باوجود شیخ رشید کو اسلام آباد ایئرپورٹ سے بیرونِ ملک روانگی سے روک دیا گیا

سابق وزیر داخلہ شیخ رشید احمد کو منگل کی رات اسلام آباد انٹرنیشنل ایئرپورٹ پر عمرہ کی غرض سے بیرونِ ملک روانہ ہونے سے روک دیا گیا، حالانکہ لاہور ہائی کورٹ راولپنڈی بینچ نے ان کا نام پاسپورٹ کنٹرول لسٹ (PCL) اور پی این آئی ایل سے نکالنے کا حکم جاری کیا تھا۔

شیخ رشید کے مطابق، جسٹس صداقت علی خان نے انہیں عمرہ پر جانے کی اجازت دی تھی اور عدالتی فیصلے کی مصدقہ کاپی متعلقہ اداروں کو بھی بھجوائی گئی تھی، جس میں واضح ہدایت تھی کہ ان کے سفر میں کوئی رکاوٹ نہ ڈالی جائے۔

تاہم، ایئرپورٹ پر پہنچنے پر حکام نے انہیں مطلع کیا کہ وہ بیرونِ ملک نہیں جا سکتے۔

شیخ رشید نے اس اقدام پر سخت مایوسی کا اظہار کرتے ہوئے کہا کہ وہ اس معاملے پر جسٹس صداقت علی خان کی عدالت میں توہینِ عدالت کی درخواست دائر کریں گے۔

انہوں نے کہا،“جس ملک میں ہائی کورٹ کا حکم نہ چلے، وہاں پھر آسمان کی طرف ہی دیکھنا پڑتا ہے۔ اللہ عمرہ بھی کرائے گا اور ان کو اپنے فیصلے پر شرمندہ بھی کرے گا۔”

یہ واقعہ ملک میں عدالتی احکامات پر عملدرآمد کے سوالات کو ایک بار پھر اجاگر کرتا ہے۔