امیرِ قطر کا بیان: پاکستان‘سعودی عرب دفاعی معاہدہ خوش آئند اور بروقت اقدام ہے

صدرِ مملکت آصف علی زرداری نے دوحہ میں امیرِ قطر شیخ تمیم بن حمد الثانی سے ملاقات کی، جس میں بلاول بھٹو زرداری اور پاکستان کے سفیر بھی شریک تھے۔ صدر زرداری نے حکومتِ پاکستان اور عوام کی جانب سے امیرِ قطر کے لیے نیک خواہشات کا پیغام پہنچایا۔

قطری امارت کے اعلامیے کے مطابق، ملاقات کے دوران دونوں رہنماؤں نے پاکستان اور قطر کے درمیان تاریخی و برادرانہ تعلقات کو مزید وسعت دینے کے عزم کا اظہار کیا۔

 امیرِ قطر نے پاکستان اور سعودی عرب کے درمیان ہونے والے دفاعی معاہدے کو ایک مثبت اور بروقت پیش رفت قرار دیا۔

صدر زرداری نے افغانستان سے متعلق دوحہ مذاکرات کی میزبانی اور خطے میں امن و استحکام کے لیے قطر کے تعمیری کردار کو سراہا۔ 

اس موقع پر صدر مملکت نے دفاع، دفاعی پیداوار، زراعت اور غذائی تحفظ کے شعبوں میں تعاون بڑھانے کی تجاویز پیش کیں، جنہیں امیرِ قطر نے سراہتے ہوئے متعلقہ حکام کو فوری اقدامات کی ہدایت کی۔

شیخ تمیم بن حمد الثانی نے قطر کی ترقی میں پاکستانی کمیونٹی کے کردار کی تعریف کرتے ہوئے ان کی تعداد میں اضافے کی خواہش ظاہر کی۔

 انہوں نے کہا کہ پاکستان ایک منفرد ملک ہے جو چین، مغرب اور خلیجی ممالک کے ساتھ بیک وقت مضبوط تعلقات رکھتا ہے، اور قطر کو پاکستان اور اس کی کامیابیوں پر فخر ہے۔

آخر میں امیرِ قطر نے صدر آصف علی زرداری کی جانب سے دی گئی دورۂ پاکستان کی دعوت قبول کرتے ہوئے آئندہ سال پاکستان کے دورے کا اعلان کیا۔