27ویں آئینی ترمیم پر اتفاقِ رائے کے لیے وزیراعظم کا بڑا اقدام ‘ اسپیکر ایاز صادق کو کلیدی ذمہ داری، پارلیمانی رہنماؤں کا اہم اجلاس طلب

وزیراعظم شہباز شریف نے پارلیمنٹ سے 27ویں آئینی ترمیم کی منظوری کے معاملے پر تمام سیاسی جماعتوں کے درمیان اتفاقِ رائے پیدا کرنے کے لیے اسپیکر قومی اسمبلی سردار ایاز صادق کو اہم ذمہ داری سونپ دی ہے۔

ذرائع کے مطابق اسپیکر قومی اسمبلی نے اس سلسلے میں آج شام 4 بجے پارلیمنٹ ہاؤس کے اسپیکر لاونج میں تمام پارلیمانی رہنماؤں کا اجلاس طلب کیا ہے۔

 اجلاس میں تحریک انصاف، جے یو آئی (ف) سمیت تمام بڑی جماعتوں کے پارلیمانی لیڈرز اور اتحادی جماعتوں کے چیف وہپس کو شرکت کی دعوت دی گئی ہے۔

اجلاس میں آئینی ترمیم کے خدوخال پر بریفنگ دی جائے گی اور اس کی منظوری کی حکمتِ عملی پر مشاورت کی جائے گی۔ 

اسپیکر ایاز صادق اجلاس کے دوران تمام جماعتوں سے ترمیم کی حمایت کی درخواست کریں گے، جب کہ وہ بعد ازاں پارلیمانی رہنماؤں سے اپنے چیمبر میں انفرادی ملاقاتیں بھی کریں گے۔

ذرائع کے مطابق اگر اپوزیشن جماعتوں سے اتفاقِ رائے نہ ہو سکا تو حکومت اپنی نمبرز گیم پر انحصار کرے گی۔ مسلم لیگ (ن) نے اپنے اور اتحادی جماعتوں کے تمام ارکانِ قومی اسمبلی کو فوری طور پر اسلام آباد پہنچنے کی ہدایت جاری کر دی ہے۔

مزید ذرائع کے مطابق حکمراں اتحاد کو قومی اسمبلی میں آئینی ترمیم کی منظوری کے لیے درکار 224 ارکان کے مقابلے میں 237 ارکان کی حمایت حاصل ہے، جس کے باعث حکومت کو ترمیم کی منظوری میں کسی بڑی رکاوٹ کا سامنا نہیں ہوگا۔