لاہور کا موسم خوشگوار، سموگ میں کمی — فضائی معیار میں بہتری کا رجحان

لاہور میں موسم کے تیور بدلنے لگے ہیں اور فضا میں خنکی کا احساس بڑھ گیا ہے۔ صوبائی دارالحکومت سمیت پنجاب کے بیشتر علاقوں میں سموگ کی شدت میں واضح کمی ریکارڈ کی گئی ہے۔

محکمہ موسمیات کے مطابق لاہور کا کم سے کم درجہ حرارت 12 اور زیادہ سے زیادہ 26 ڈگری سینٹی گریڈ رہنے کا امکان ہے، جبکہ موجودہ درجہ حرارت 17 ڈگری سینٹی گریڈ ریکارڈ کیا گیا۔ ہوا کی رفتار 8 کلومیٹر فی گھنٹہ ہے اور بارش کے امکانات فی الحال نہیں ہیں۔

ایئر کوالٹی انڈیکس کے مطابق مجموعی طور پر لاہور میں فضائی معیار 185 ریکارڈ کیا گیا۔ گلبرگ ٹو کا اے کیو آئی 240، برکی روڈ 228 اور ڈی ایچ اے کا 217 رہا۔ ماہرین نے شہریوں کو مشورہ دیا ہے کہ غیر ضروری طور پر باہر نکلنے سے گریز کریں اور ماسک کا استعمال لازمی بنائیں۔

محکمہ ماحولیات کے مطابق ہواؤں کا رخ شمال مغرب سے جنوب مشرق کی جانب ہے، جس سے آلودہ ہوا لاہور اور مشرقی پنجاب سے باہر کی طرف دھکیلی جا رہی ہے۔ اس بہاؤ کے باعث لاہور، قصور اور شیخوپورہ میں فضائی معیار میں نمایاں بہتری دیکھی جا رہی ہے، تاہم ملتان اور بہاولپور میں آلودگی میں بتدریج اضافہ متوقع ہے۔

پنجاب حکومت نے ’’کلین ایئر ایکشن پلان‘‘ کے تحت روزانہ کی بنیاد پر سموگ مانیٹرنگ اور فوری ردعمل کے یونٹس فعال کر دیے ہیں۔ سینئر صوبائی وزیر مریم اورنگزیب کے مطابق فضائی معیار میں بہتری کے لیے جدید سسٹمز نصب کیے جا رہے ہیں۔ انہوں نے شہریوں سے اپیل کی کہ غیر ضروری سفر سے پرہیز کریں، ماسک پہنیں اور صبح و شام بچوں و بزرگوں کو کھلی فضا میں جانے سے روکیں۔

محکمہ صحت نے شہریوں کو ہدایت دی ہے کہ اگر گلے یا آنکھوں میں جلن، سانس میں دشواری یا کھانسی جیسی علامات ظاہر ہوں تو فوری طور پر قریبی اسپتال سے رجوع کریں۔

پنجاب حکومت کے ترجمان کے مطابق عوامی آگاہی مہم ’’صاف فضا، محفوظ پنجاب‘‘ کے اگلے مرحلے میں تعلیمی اداروں، مارکیٹوں اور میڈیا کے ذریعے سموگ سے بچاؤ کی آگاہی مہم تیز کی جا رہی ہے۔