یومِ شہداء جموں‘ صدر آصف زرداری اور وزیراعظم شہباز شریف کا شہداء کو خراجِ عقیدت، کشمیر کے حقِ خودارادیت پر پاکستان کے غیر متزلزل عزم کا اعادہ

اسلام آباد: صدرِ مملکت آصف علی زرداری اور وزیراعظم شہباز شریف نے یومِ شہداء جموں کے موقع پر شہداء جموں کو خراجِ عقیدت پیش کرتے ہوئے مقبوضہ جموں و کشمیر کے عوام کی حقِ خودارادیت کی جدوجہد میں پاکستان کی غیر متزلزل حمایت کا اعادہ کیا۔

صدر آصف علی زرداری نے اپنے پیغام میں کہا کہ عالمی برادری خصوصاً اقوامِ متحدہ جموں کے قتلِ عام کو نسل کشی کے طور پر تسلیم کرے اور بھارت کو بین الاقوامی قوانین کی سنگین خلاف ورزیوں پر جواب دہ ٹھہرائے۔

انہوں نے کہا کہ بھارت مقبوضہ جموں و کشمیر کی آبادیاتی ساخت کو تبدیل کرنے کی کوشش کر رہا ہے جو عالمی قانون کی کھلی خلاف ورزی ہے۔

صدر زرداری نے کہا کہ 6 نومبر 1947 برصغیر کی تاریخ کے بدترین سانحات میں سے ایک تھا، جب ہندو ڈوگرہ افواج نے آر ایس ایس کے انتہا پسندوں اور پٹیالہ و کپورتھلہ کی مسلح جماعتوں کی مدد سے لاکھوں مسلمانوں کا قتل عام کیا۔

 اس منظم کارروائی میں دو لاکھ سے زائد مسلمان شہید اور پانچ لاکھ سے زیادہ افراد بے گھر ہو کر پاکستان کی جانب ہجرت پر مجبور ہوئے۔

انہوں نے کہا کہ جموں کا قتلِ عام تاریخ کے سیاہ ترین ابواب میں شامل ہے، جسے عالمی ضمیر نے وہ توجہ نہیں دی جو اسے ملنی چاہیے تھی۔

دوسری جانب، وزیراعظم شہباز شریف نے کہا کہ پاکستان ان تمام کشمیری شہداء کو سلامِ عقیدت پیش کرتا ہے جنہوں نے آزادی کی جدوجہد میں اپنی جانوں کا نذرانہ پیش کیا۔

انہوں نے واضح کیا کہ بھارت نے اقوامِ متحدہ کی قراردادوں اور بین الاقوامی قوانین کی خلاف ورزی کرتے ہوئے مقبوضہ کشمیر پر غیر قانونی قبضہ برقرار رکھا ہوا ہے، جسے پاکستان اور عالمی برادری کے تمام انصاف پسند حلقے مسترد کرتے ہیں۔

وزیراعظم نے کہا کہ 6 نومبر کا دن کشمیریوں پر ڈھائے گئے مظالم کی یاد دلاتا ہے اور آج بھی اُن کے دلوں پر تازہ زخم کی مانند ہے۔ یہ دن کشمیریوں کے خلاف بھارتی افواج کی پہلی منظم نسل کشی کی علامت کے طور پر ہمیشہ تاریخ میں یاد رکھا جائے گا۔