جنرل ساحر شمشاد کا برونائی کا دورہ، دفاعی تعاون بڑھانے پر اتفاق — پاکستان کی قربانیوں اور امن کردار کو سراہا گیا

چیئرمین جوائنٹ چیفس آف اسٹاف کمیٹی جنرل ساحر شمشاد مرزا نے برونائی دارالسلام کا سرکاری دورہ کیا، جہاں دونوں ممالک کے درمیان دفاعی اور عسکری تعاون کو مزید فروغ دینے پر اتفاق کیا گیا۔

آئی ایس پی آر کے مطابق، جنرل ساحر شمشاد مرزا نے سلطانِ برونائی سے ملاقات کی، جنہوں نے پاکستان کی مسلح افواج کے پیشہ ورانہ معیار اور دہشت گردی کے خلاف قربانیوں کو سراہا۔ ملاقات میں باہمی دلچسپی کے امور، علاقائی سلامتی اور دفاعی تعلقات کے فروغ پر تبادلہ خیال کیا گیا۔

دورے کے دوران جنرل ساحر شمشاد مرزا نے وزیرِ دفاع اور کمانڈر رائل برونائی آرمڈ فورسز سے بھی علیحدہ ملاقاتیں کیں۔ انہوں نے موارا نیول بیس اور ڈیفنس اکیڈمی رائل برونائی آرمڈ فورسز کا دورہ کیا، جہاں انہوں نے "پاکستان کا علاقائی امن و استحکام میں کردار" کے موضوع پر خطاب کیا اور پاکستان کی قربانیوں اور کامیابیوں پر روشنی ڈالی۔

انہوں نے اکیڈمی کے کمانڈ اینڈ اسٹاف کورس کے شرکاء سے بھی بات چیت کی، جن میں 19 مختلف ممالک کے افسران شامل تھے۔ ملاقاتوں میں دونوں ممالک کے وفود نے عالمی و علاقائی سکیورٹی کی صورتحال پر تفصیلی گفتگو کی۔

برونائی کی سول و عسکری قیادت نے پاکستان کے امن کردار اور عسکری مہارت کی تعریف کی، جبکہ جنرل ساحر شمشاد کی برونائی آرمڈ فورسز کے ہیڈکوارٹرز آمد پر انہیں گارڈ آف آنر بھی پیش کیا گیا۔