میکسیکو کی خاتون صدر کلاڈیا شین بام عوامی مقام پر ہراسانی کا شکار، واقعہ خواتین کے تحفظ پر سوالیہ نشان

میکسیکو کی پہلی خاتون صدر کلاڈیا شین بام کے ساتھ عوامی مقام پر ہراسانی کا واقعہ پیش آیا، جس کی ویڈیو سامنے آنے کے بعد خواتین کے خلاف تشدد اور عدم تحفظ کا مسئلہ ایک بار پھر اجاگر ہوگیا۔

ویڈیو وائرل ہونے کے بعد صدر کلاڈیا شین بام نے کہا کہ "اگر یہ سب میرے ساتھ ہوسکتا ہے، تو عام خواتین کیسے محفوظ رہ سکتی ہیں؟" ان کا کہنا تھا کہ کوئی مرد کسی عورت کی ذاتی حدود پامال کرنے کا حق نہیں رکھتا۔

صدر نے ایک مقامی اخبار کی جانب سے واقعے کی تصاویر شائع کرنے پر سخت تنقید کرتے ہوئے کہا کہ یہ اقدام خواتین کو دوبارہ نشانہ بنانے کے مترادف ہے اور اخلاقی طور پر ناقابلِ قبول ہے۔

 انہوں نے اخبار سے تحریری معافی کا مطالبہ کرتے ہوئے کہا کہ ایسی تصاویر شائع کرنا ڈیجیٹل تشدد کے قانون کی خلاف ورزی ہے۔

کلاڈیا شین بام نے اعلان کیا کہ حکومت ہراسانی کو قابلِ سزا جرم قرار دینے کے لیے قانونی اصلاحات لانے پر کام کرے گی۔ واقعے کے بعد پولیس نے فوری کارروائی کرتے ہوئے ملزم کو گرفتار کرلیا۔