جی ایچ کیو میں برطانوی آرمی چیف کی فیلڈ مارشل عاصم منیر سے ملاقات، دفاعی تعاون بڑھانے پر اتفاق

راولپنڈی میں برطانیہ کے چیف آف جنرل اسٹاف جنرل سر چارلس رولینڈ ونسنٹ واکر نے جمعرات کے روز جنرل ہیڈکوارٹرز (جی ایچ کیو) کا دورہ کیا، جہاں انہوں نے فیلڈ مارشل سید عاصم منیر سے ملاقات کی۔

پاک فوج کے شعبۂ تعلقات عامہ (آئی ایس پی آر) کے مطابق، ملاقات میں باہمی دلچسپی کے امور، علاقائی سلامتی کی صورتحال اور دفاعی تعاون کے فروغ پر تفصیلی تبادلہ خیال کیا گیا۔

دونوں رہنماؤں نے خطے میں امن و استحکام کے لیے قریبی تعاون جاری رکھنے پر اتفاق کیا۔

دورے پر آئے برطانوی آرمی چیف نے دہشتگردی کے خلاف پاکستان آرمی کی قربانیوں اور علاقائی امن کے لیے اس کے مثبت کردار کو سراہا۔

انہوں نے کہا کہ پاکستان نے خطے میں استحکام کے قیام کے لیے نمایاں کردار ادا کیا ہے۔

اس موقع پر جنرل سر چارلس واکر نے یادگارِ شہداء پر پھول چڑھائے اور شہداء کو خراجِ عقیدت پیش کیا، بعد ازاں انہیں پاکستان آرمی کے چاق و چوبند دستے نے گارڈ آف آنر پیش کیا۔