سنی اتحاد کونسل کے سربراہ صاحبزادہ حامد رضا فیصل آباد سے گرفتار، 9 مئی کیسز میں سزا یافتہ

فیصل آباد: سنی اتحاد کونسل کے چیئرمین صاحبزادہ حامد رضا کو پولیس نے فیصل آباد سے گرفتار کر لیا ہے۔

پولیس ذرائع کے مطابق حامد رضا متعدد مقدمات میں مطلوب اور عدالتی طور پر سزا یافتہ ہیں۔ انہیں گرفتار کر کے فیصل آباد سینٹرل جیل منتقل کر دیا گیا ہے۔

ذرائع کا کہنا ہے کہ اسلام آباد پولیس نے حامد رضا کو گرفتار کرنے کے بعد فیصل آباد پولیس کے حوالے کیا، جس نے بعد ازاں انہیں انسدادِ دہشت گردی عدالت (اے ٹی سی) میں پیش کیا۔ عدالت نے حامد رضا کو جیل بھیجنے کا حکم دے دیا۔

یاد رہے کہ رواں سال 31 جولائی کو فیصل آباد میں اے ٹی سی کی خصوصی عدالت نے 9 مئی کے تین مقدمات میں فیصلہ سنایا تھا، جس کے تحت 196 ملزمان کو مختلف سزائیں دی گئیں۔

عدالتی فیصلے کے مطابق عمر ایوب، شبلی فراز، زرتاج گل اور صاحبزادہ حامد رضا کو تینوں مقدمات میں 10، 10 سال قید کی سزا سنائی گئی تھی۔