پی آئی اے انجینئرز اور انتظامیہ کا تنازع شدت اختیار کر گیا، فلائٹ آپریشن متاثر

قومی ایئرلائن پی آئی اے کے انجینئرز اور انتظامیہ کے درمیان جاری تنازع شدت اختیار کر گیا ہے، جس کے نتیجے میں متعدد پروازیں منسوخ اور تاخیر کا شکار ہو گئی ہیں۔

ذرائع کے مطابق، انجینئرز کے کام روک دینے سے طیاروں کی کلیئرنس متاثر ہوئی ہے، جس کے باعث کراچی سے دبئی اور ملتان جانے والی پروازیں منسوخ کر دی گئیں، جبکہ کراچی سے لاہور، کوئٹہ اور مدینہ کی پروازیں تاخیر کا شکار ہیں۔

اسی طرح لاہور سے کراچی آنے والی پرواز بروقت روانہ نہ ہو سکی، اور اسلام آباد سے سکردو جانے والی پرواز میں بھی تاخیر کی اطلاعات موصول ہوئیں۔

پی آئی اے انجینئرز کا کہنا ہے کہ انہیں تنخواہوں، الاؤنسز اور سروس اسٹرکچر سے متعلق کیے گئے وعدے تاحال پورے نہیں کیے گئے، جس کے باعث وہ اپنے مطالبات کے حق میں احتجاج پر مجبور ہیں۔

انتظامیہ کی جانب سے موقف اختیار کیا گیا ہے کہ انجینئرز کا احتجاج مسافروں کے لیے مشکلات پیدا کر رہا ہے اور فلائٹ آپریشن متاثر ہونا کسی کے مفاد میں نہیں۔

ذرائع کے مطابق فریقین کے درمیان مذاکرات جاری ہیں، تاہم اگر معاملہ جلد حل نہ ہوا تو پروازوں کے شیڈول میں مزید تعطل کا امکان ہے۔