صائمہ قریشی نے اپنے مشکل ازدواجی سفر اور طلاق کے بارے میں پہلی بار کھل کر بات کی

پاکستانی ڈرامہ انڈسٹری کی معروف اداکارہ صائمہ قریشی نے حال ہی میں اپنے طویل اور مشکل ازدواجی سفر کے بارے میں پہلی بار کھل کر بات کی۔

مشہور اداکار فیصل قریشی کی کزن صائمہ قریشی کئی سالوں سے ڈرامہ انڈسٹری سے وابستہ ہیں اور خاص طور پر منفی کرداروں کی وجہ سے شہرت رکھتی ہیں۔ انہوں نے عشق بے پرواہ، نند، بندھے ایک ڈور سے، نکاح اور دنیا پور سمیت متعدد کامیاب ڈراموں میں اپنی اداکاری کے جوہر دکھائے ہیں۔

حال ہی میں صائمہ ایک شو میں شریک ہوئیں جہاں انہوں نے اپنی ذاتی زندگی اور طلاق کے بارے میں کھل کر گفتگو کی۔

اپنی مشکل ازدواجی زندگی کے بارے میں بات کرتے ہوئے انہوں نے کہا کہ ہر عورت کوشش کرتی ہے کہ اس کی شادی کامیاب ہو اور گھر بسا رہے، لیکن بعض اوقات حالات انسان کی خواہشات کے خلاف ہو جاتے ہیں۔ انہوں نے کہا کہ خواتین اکثر امید رکھتی ہیں کہ ان کے شوہر بدل جائیں گے، مگر بعض رویے بدلنا ممکن نہیں ہوتا، اور یہ ان کے رشتے میں بھی سچ تھا۔

صائمہ قریشی نے مزید بتایا کہ طلاق ان کے لیے زندگی کا پہلا بڑا صدمہ نہیں تھا، بلکہ بچپن میں والد کا انتقال ان کے لیے سب سے زیادہ تکلیف دہ واقعہ تھا، جو آج بھی انہیں یاد ہے۔

صائمہ قریشی تین بیٹوں کی والدہ ہیں، اور ان کے بڑے بیٹے نے حال ہی میں اداکاری کی دنیا میں قدم رکھا ہے۔