ترک صدر کا افغانستان میں پائیدار امن کیلئے اعلیٰ سطح وفد پاکستان بھیجنے کا اعلان

ترکیہ کے صدر رجب طیب اردوان نے افغانستان میں مستقل امن اور خطے میں کشیدگی کم کرنے کے لیے ایک اعلیٰ سطح ترک وفد پاکستان بھیجنے کا اعلان کیا ہے۔

ترک وفد پاکستان میں متعلقہ حکام سے ملاقاتیں کرے گا اور پاک–افغان فائر بندی کی موجودہ صورتحال کا تفصیلی جائزہ لے گا۔

برطانوی خبر رساں ادارے کے مطابق وفد میں ترکی کے وزیرِ خارجہ، وزیرِ دفاع اور انٹیلی جنس چیف شامل ہوں گے۔ اس دورے کا بنیادی مقصد پاک–افغان فائر بندی کو حتمی شکل دینا اور دوطرفہ اعتماد سازی کے اقدامات پر بات چیت کرنا ہے۔

صدر اردوان نے باکو سے واپسی پر وزیراعظم شہباز شریف سے ملاقات کے بعد اس دورے کا اعلان کیا۔ ان کا کہنا تھا کہ ترکیہ چاہتا ہے کہ پاکستان اور افغانستان کے درمیان پائیدار امن قائم ہو تاکہ جنوبی ایشیا میں استحکام اور علاقائی تعاون کو فروغ دیا جا سکے۔

ذرائع کے مطابق مذاکرات کے دوران طویل المدتی امن کے لیے عملی لائحہ عمل اور فالو اپ میکانزم پر بھی اتفاق متوقع ہے۔