اداکارہ انزیلہ عباسی کا انکشاف: “22 سال کی عمر میں خودمختار زندگی کا فیصلہ کیا، ماں نے میرا ساتھ دیا”

پاکستانی اداکارہ، ماڈل اور گلوکارہ انزیلہ عباسی نے انکشاف کیا ہے کہ انہوں نے صرف 22 سال کی عمر میں گھر چھوڑنے اور خودمختار زندگی گزارنے کا فیصلہ کیا تھا۔

 ایک حالیہ پوڈکاسٹ میں گفتگو کرتے ہوئے انزیلہ نے بتایا کہ ابتدا میں یہ فیصلہ مشکل تھا، مگر وقت کے ساتھ ماں کے ساتھ ان کے تعلقات مزید مضبوط ہو گئے۔

انہوں نے کہا، “امی مجھ پر اعتماد کرنے لگیں، میرے گھر آتیں، کھانا بناتیں اور ہم خوشگوار وقت گزارتے تھے۔ بعد میں جب انہوں نے کہا کہ اب تم زندگی میں سیٹ ہو چکی ہو، تو میں واپس ان کے ساتھ رہنے چلی گئی۔”

انزیلہ عباسی نے پاکستانی ڈرامہ انڈسٹری پر بات کرتے ہوئے کہا کہ “ہمارے ڈراموں میں بار بار صرف ساس بہو کے تنازعات دکھائے جا رہے ہیں، جس سے ناظرین کا مائنڈ سیٹ بھی ویسا بن گیا ہے۔ ہمیں ڈراموں کے ذریعے معاشرتی اور اہم مسائل پر آگاہی پیدا کرنی چاہیے۔”

اداکارہ نے اپنی ذاتی زندگی کے حوالے سے کہا کہ وہ خود کو کسی ایک شعبے تک محدود نہیں رکھنا چاہتیں — “میں ایکٹر بھی ہوں، ماڈل بھی اور گلوکارہ بھی۔ مجھے تخلیقی کام پسند ہے اور ہر فیلڈ میں کچھ نیا آزمانا چاہتی ہوں۔”

اپنے والدین جویریہ عباسی اور شمعون عباسی کے حوالے سے انزیلہ نے کہا کہ “امی نے طلاق کے بعد میری پرورش مضبوطی سے کی۔ وہ بہت کم عمر تھیں جب میں پیدا ہوئی، مگر انہوں نے ماں اور باپ دونوں کا کردار نبھایا۔ میں نے کبھی والد کی کمی محسوس نہیں کی۔”

والد کے بارے میں بات کرتے ہوئے ان کا کہنا تھا کہ “میں انہیں ایک بہترین اداکار مانتی ہوں، مگر انہیں رول ماڈل نہیں سمجھتی۔ میں نے ان سے صرف یہ سیکھا کہ اپنے فن پر لگن کے ساتھ محنت کرنی چاہیے۔”

یاد رہے کہ انزیلہ عباسی معروف فنکار جوڑی جویریہ عباسی اور شمعون عباسی کی بیٹی ہیں، جنہوں نے 1997 میں شادی کی اور 2007 میں علیحدگی اختیار کر لی۔

 انزیلہ متعدد ڈراموں جیسے لال عشق، گلہ اور حقیقت میں اپنی اداکاری سے ناظرین کو متاثر کر چکی ہیں۔ وہ اگست 2023 میں تشفیٰ انصاری کے ساتھ رشتۂ ازدواج میں منسلک ہوئیں۔