نامور دانشور اور ماہرِ تعلیم ڈاکٹر عارفہ سیدہ زہرا لاہور میں انتقال کر گئیں

پاکستان کی معروف ماہرِ تعلیم، دانشور اور مصنفہ ڈاکٹر عارفہ سیدہ زہرا انتقال کر گئی ہیں۔

 ان کے انتقال کی تصدیق ممتاز ادیب اور ڈرامہ نگار اصغر ندیم سید نے کی، جنہوں نے گہرے دکھ اور افسوس کا اظہار کرتے ہوئے بتایا کہ ڈاکٹر عارفہ سیدہ زہرا کا انتقال لاہور میں ہوا، جب کہ ان کی نمازِ جنازہ کا اعلان بعد میں کیا جائے گا۔

ڈاکٹر عارفہ سیدہ زہرا نے ایم اے اردو گورنمنٹ کالج لاہور سے مکمل کیا اور ایسٹ ویسٹ سینٹر، یونیورسٹی آف ہوائی سے تاریخ میں ڈاکٹریٹ کی ڈگری حاصل کی۔ وہ 1986ء سے 2009ء تک گورنمنٹ کالج فار ویمن گلبرگ لاہور کی پرنسپل رہیں۔

وہ سات زبانوں پر عبور رکھتی تھیں اور کئی تعلیمی، سماجی و ثقافتی اداروں اور کمیٹیوں میں فعال کردار ادا کرتی رہیں۔

الحمرا آرٹس کونسل کے چیئرمین رضی احمد نے ڈاکٹر عارفہ سیدہ زہرا کے انتقال پر گہرے دکھ کا اظہار کرتے ہوئے کہا کہ انہوں نے اردو زبان کو تحقیق اور تہذیب کا استعارہ بنا دیا۔