افغانستان میں دہشتگردوں کی جدید اسلحے تک رسائی علاقائی امن کے لیے سنگین خطرہ ہے، پاکستان کا اقوام متحدہ میں اظہارِ تشویش

پاکستان نے اقوامِ متحدہ کی سلامتی کونسل میں افغانستان میں دہشتگردوں کی جدید اور غیر قانونی اسلحے تک رسائی کو علاقائی امن و استحکام کے لیے سنگین خطرہ قرار دیا ہے۔

اقوام متحدہ میں پاکستان کے مستقل مندوب عاصم افتخار نے اپنے خطاب میں کہا کہ دہشتگرد گروہ افغانستان سے کھلے عام کارروائیاں کر رہے ہیں، جبکہ وہاں موجود جدید ہتھیاروں اور گولہ بارود کے بڑے ذخائر عالمی سلامتی کے لیے تشویش ناک ہیں۔

انہوں نے کہا کہ مصدقہ معلومات کے مطابق یہ اسلحہ دہشتگردی کے مقاصد کے لیے پڑوسی ممالک، بالخصوص پاکستان، میں اسمگل کیا جا رہا ہے۔ سرحدی علاقوں سے پکڑا گیا ہتھیار انہی ذخائر سے منسلک ہے جو غیر ملکی افواج کے انخلا کے بعد افغانستان میں چھوڑ دیا گیا تھا۔

عاصم افتخار نے مزید کہا کہ افغانستان میں سرگرم دہشتگرد تنظیمیں — داعش، تحریک طالبان پاکستان (TTP)، بلوچ لبریشن آرمی (BLA) اور مجید بریگیڈ — ان ہتھیاروں کا استعمال پاکستان کے عام شہریوں اور سیکیورٹی فورسز کے خلاف کر رہی ہیں، جس سے ہزاروں بے گناہ جانیں ضائع ہو چکی ہیں۔

انہوں نے عالمی برادری سے مطالبہ کیا کہ وہ دہشتگرد گروہوں کی اسلحے تک رسائی روکنے کے لیے مؤثر اقدامات کرے اور افغان عبوری حکام کو ان کے بین الاقوامی وعدوں پر عملدرآمد کا پابند بنائے۔