نشانہ بازی میں مہارت فوجی تربیت کا بنیادی جزو ہے: فیلڈ مارشل سید عاصم منیر

فیلڈ مارشل جنرل سید عاصم منیر نے کہا ہے کہ نشانہ بازی میں مہارت فوجی تربیت کا بنیادی اور لازمی جزو ہے، کیونکہ یہ پیشہ ورانہ استعداد اور جنگی تیاری کا اہم مظہر ہے۔

پاک فوج کے شعبہ تعلقات عامہ (آئی ایس پی آر) کے مطابق 45ویں پاکستان آرمی رائفل ایسوسی ایشن (پی اے آر اے) سنٹرل میٹ کی اختتامی تقریب جہلم میں منعقد ہوئی، جس میں فیلڈ مارشل عاصم منیر نے بطور مہمانِ خصوصی شرکت کی۔

مقابلے میں پاک فوج، بحریہ، فضائیہ، سول آرمڈ فورسز اور صوبائی ٹیموں نے بھرپور حصہ لیا۔ 45ویں پی اے آر اے سنٹرل میٹ میں دو ہزار سے زائد شوٹرز نے شرکت کی۔

پاک فوج نے تیسری انٹر سروسز کامبیٹ شوٹنگ چیمپئن شپ 2025 جیت لی، تمام چار انٹر سروسز میچز میں کامیابی حاصل کی۔

 پنجاب رجمنٹ نے یونٹ فائرنگ پروفیشنسی میچ (گروپ-ون) میں پہلی پوزیشن حاصل کی، جبکہ سپاہی محمد عرفان کو “ماسٹر ایٹ آرمز” کا اعزاز ملا۔ آرمی مارکس مین شپ یونٹ کے نائب صوبیدار عمر فاروق نے “آرمی ہنڈرڈ رائفل میچ ٹرافی” اپنے نام کی۔

اس موقع پر فیلڈ مارشل عاصم منیر نے شرکاء کی بہترین کارکردگی کو سراہا اور کہا کہ نشانہ بازی میں مہارت پاک فوج کی بنیادی تربیت اور جنگی تیاری کا لازمی حصہ ہے۔

بعد ازاں آرمی چیف نے ملٹری کالج جہلم کی سو سالہ تقریبات میں شرکت کی، سینٹینری یادگار اور کالج میوزیم کا افتتاح کیا اور ادارے کی ایک صدی پر محیط شاندار خدمات کو خراجِ تحسین پیش کیا۔

انہوں نے کہا کہ ملٹری کالج جہلم نے قیادت، نظم و ضبط اور حب الوطنی کے فروغ میں نمایاں کردار ادا کیا ہے۔ اس موقع پر انہوں نے یادگارِ شہداء پر پھول چڑھائے، جبکہ کور کمانڈر راولپنڈی اور آئی جی ٹریننگ اینڈ ایویلیوایشن نے ان کا استقبال کیا۔