وانا کیڈٹ کالج پر حملہ ‘سکیورٹی فورسز نے 115 افراد کو بحفاظت ریسکیو کرلیا، آپریشن جاری

وانا کیڈٹ کالج پر دہشتگردوں کے حملے کے بعد سکیورٹی فورسز نے فوری ایکشن لیتے ہوئے 115 افراد کو بحفاظت ریسکیو کرلیا ہے۔

سکیورٹی ذرائع کے مطابق حملے کے وقت کیڈٹ کالج میں 525 کیڈٹس سمیت تقریباً 650 افراد موجود تھے۔ کیڈٹ کالج میں داخل ہونے والے تین افغان خوارجین کو سکیورٹی فورسز نے ایک مخصوص عمارت تک محدود کر دیا ہے، جبکہ پورے علاقے کو گھیرے میں لے لیا گیا ہے۔

ذرائع نے بتایا کہ جس عمارت میں دہشتگرد موجود ہیں، وہ کیڈٹس کی رہائشی عمارتوں سے کافی فاصلے پر ہے۔ تمام کیڈٹس محفوظ ہیں، اور ان کی جانوں کے تحفظ کے لیے آپریشن انتہائی احتیاط سے جاری ہے۔

کالج کی حدود سے طلبہ کے انخلا کا عمل بتدریج جاری ہے، تاہم اب بھی تقریباً 535 افراد اندر موجود ہیں۔ افغان خوارج کے خلاف سکیورٹی فورسز کا آپریشن پوری شدت سے جاری ہے۔

ذرائع کے مطابق دہشتگردوں نے کالج کے مرکزی دروازے پر بارود سے بھری گاڑی ٹکرا دی تھی، جس سے دروازہ مکمل طور پر تباہ ہوگیا اور قریبی عمارتوں کو بھی نقصان پہنچا۔

پاک فوج کے جوانوں نے فوری کارروائی کرتے ہوئے دو دہشتگردوں کو موقع پر ہی ہلاک کر دیا۔ ذرائع کے مطابق معصوم قبائلی بچوں پر حملہ کرنے والے ان خوارج کا اسلام سے کوئی تعلق نہیں۔

سکیورٹی فورسز نے واضح کیا ہے کہ دہشتگردوں کے مکمل خاتمے تک آپریشن جاری رہے گا۔