پاکستان کا ترکیہ میں سی-130 طیارے کے المناک حادثے پر اظہارِ افسوس‘ جاں بحق اہلکاروں کے خاندانوں سے ہمدردی

پاکستان نے ترکیہ کے سی-130 فوجی طیارے کے المناک حادثے پر گہرے دکھ اور افسوس کا اظہار کیا ہے۔ ترجمان دفترِ خارجہ نے تعزیتی بیان میں کہا کہ پاکستان اس سانحے میں جاں بحق ہونے والے تمام اہلکاروں کے خاندانوں کے غم میں برابر کا شریک ہے۔

ترجمان کے مطابق پاکستان مشکل کی اس گھڑی میں ترکیہ کے عوام اور حکومت کے ساتھ مکمل یکجہتی کا اظہار کرتا ہے۔ دفترِ خارجہ نے مرحومین کے لیے مغفرت اور ان کے سوگوار خاندانوں کے صبر جمیل کی دعا بھی کی۔

واضح رہے کہ ترک فضائیہ کا سی-130 طیارہ آذربائیجان اور جارجیا کی سرحد کے قریب گر کر تباہ ہوگیا تھا، جس میں 20 اہلکار جاں بحق ہوئے۔ رپورٹ کے مطابق طیارہ آذربائیجان سے ترکیہ روانہ ہوا تھا مگر روانگی کے کچھ ہی دیر بعد حادثے کا شکار ہوگیا۔

ترک خبر ایجنسی کے مطابق صدر رجب طیب اردوان نے انقرہ میں ایک تقریب کے دوران واقعے پر گہرے دکھ کا اظہار کیا اور بتایا کہ امدادی ٹیمیں مقامی حکام کے ساتھ ریسکیو آپریشن میں مصروف ہیں۔ صدر اردوان نے کہا کہ "ہماری دعائیں شہداء کے اہلخانہ کے ساتھ ہیں۔"