عطاء تارڑ: حکومت کو 27ویں آئینی ترمیم کی منظوری کے لیے مطلوبہ اکثریت حاصل ہے، وانا آپریشن تاریخی تھا

وفاقی وزیر اطلاعات عطاء تارڑ نے کہا ہے کہ حکومت کے پاس 27ویں آئینی ترمیم منظور کروانے کے لیے ضروری اکثریت موجود ہے اور ایوان میں رائے شماری کے دوران یہ بل آسانی سے پاس ہو جائے گا۔

 انہوں نے میڈیا سے گفتگو کرتے ہوئے کہا کہ اگر آج ترمیم ایوان میں پیش کی گئی تو اسے یقینی طور پر منظوری حاصل ہوگی۔

وزیر اطلاعات نے اپوزیشن پر تنقید کرتے ہوئے کہا کہ بل پر پڑھے بغیر شور مچانے اور بیانیہ بنانے سے کوئی فائدہ نہیں ہوگا، اور شق وار بحث میں حصہ لینا چاہیے تھا۔

عطاء تارڑ نے وانا میں پاک فوج کے کامیاب آپریشن کو تاریخی قرار دیا اور بتایا کہ اس میں 500 سے زائد طلبہ کو دہشتگردوں کے قبضے سے بازیاب کرایا گیا۔

 انہوں نے کہا کہ دشمن کو یہ پیغام جان لینا چاہیے کہ پاکستان نے اپنے سے چار گنا بڑے دشمن کو شکست دی اور پراکسی وار ہمارے لیے کوئی مسئلہ نہیں۔

نواز شریف کی پارلیمنٹ ہاؤس آمد کے بارے میں سوال پر وزیر اطلاعات نے مزاحیہ انداز میں کہا کہ صحافی کو بھی ملاقات کروائیں گے۔