اسلام آباد کچہری دھماکے کا مقدمہ سی ٹی ڈی میں درج، شہداء کی میتیں ورثاء کے حوالے

اسلام آباد کے جوڈیشل کمپلیکس کے باہر ہونے والے خودکش دھماکے کے بعد مقدمہ تھانہ کاؤنٹر ٹیررازم ڈیپارٹمنٹ (سی ٹی ڈی) میں درج کر لیا گیا ہے۔

 ذرائع کے مطابق، یہ مقدمہ سرکار کی مدعیت میں نمبر 10/25 کے تحت انسداد دہشتگردی ایکٹ کے مختلف سیکشنز کے تحت درج کیا گیا، جس میں قتل، اقدامِ قتل اور دیگر سنگین دفعات شامل ہیں۔

ایف آئی آر میں شہداء اور زخمیوں کی تفصیلات کے ساتھ دھماکے سے پیدا ہونے والے خوف و ہراس اور گاڑیوں کو پہنچنے والے نقصان کا بھی ذکر کیا گیا ہے۔

 قانون نافذ کرنے والے اداروں نے تحقیقات شروع کر دی ہیں اور جائے وقوعہ سے حاصل شواہد کو فرانزک ٹیموں کے حوالے کر دیا گیا ہے۔

دھماکے میں جاں بحق ہونے والے تمام افراد کی میتیں پوسٹ مارٹم اور ضابطے کی کارروائی کے بعد ورثاء کے حوالے کر دی گئیں۔ 

پمز ہسپتال کے ذرائع کے مطابق، اسلام آباد کچہری دھماکے میں 13 زخمی زیر علاج ہیں جن میں ایک کی حالت تشویش ناک ہے۔

واضح رہے کہ گزشتہ روز افغان اور بھارتی پراکسی گروپ نے اسلام آباد کو نشانہ بنایا تھا، جس کے نتیجے میں عدالت کے باہر پولیس گاڑی پر خودکش دھماکے میں 12 افراد شہید اور 36 زخمی ہوئے تھے۔