پاکستان نے سری لنکا کے خلاف پہلے ون ڈے میں 6 رنز سے فتح حاصل کر کے آئی سی سی رینکنگ میں چوتھی پوزیشن حاصل کر لی

پاکستان نے راولپنڈی کرکٹ اسٹیڈیم میں سری لنکا کے خلاف پہلے سنسنی خیز ون ڈے میچ میں 6 رنز سے کامیابی حاصل کی، جس سے نہ صرف سیریز میں 1-0 کی برتری حاصل ہوئی بلکہ آئی سی سی مردوں کی ون ڈے ٹیم رینکنگ میں پاکستان چوتھے نمبر پر پہنچ گیا جبکہ سری لنکا پانچویں نمبر پر چلا گیا۔

پاکستان نے پہلے بیٹنگ کرتے ہوئے 5 وکٹوں کے نقصان پر 299 رنز بنائے، جس میں سلمان علی آغا نے 105 رنز کی شاندار ناقابلِ شکست اننگز کھیل کر ’پلیئر آف دی میچ‘ کا ایوارڈ حاصل کیا اور بیٹنگ رینکنگ میں 14 درجے ترقی کر کے 16ویں نمبر پر پہنچ گئے۔

 آل راؤنڈر حسین طلعت نے 62 رنز بنائے اور محمد نواز نے 36 رنز کا قیمتی ساتھ دیا۔

جواب میں سری لنکا نے 50 اوورز میں 9 وکٹوں پر 293 رنز بنائے، جس میں ونندو ہسارنگا نے 59 اور سدھیرا سماراوکراما نے 39 رنز کی اننگز کھیلیں۔ فاسٹ بولر حارث رؤف نے 4 وکٹیں حاصل کیں جبکہ فہیم اشرف، نسیم شاہ اور محمد نواز نے بھی اہم وکٹیں حاصل کیں۔

دونوں ٹیمیں جمعرات کو دوسرے ون ڈے میں ایک بار پھر مد مقابل ہوں گی، جہاں پاکستان مسلسل دوسری فتح کے لیے پر امید ہے۔