آرمی ایکٹ ترمیمی بل آج سینیٹ میں پیش کیا جائے گا

آرمی ایکٹ ترمیمی بل کی منظوری کیلئے آج اہم سینیٹ اجلاس منعقد ہو گا، جس میں وزیرِ دفاع خواجہ محمد آصف یہ بل ایوان میں پیش کریں گے۔ اجلاس کا سرکاری ایجنڈا بھی جاری کر دیا گیا ہے۔

ایجنڈے کے مطابق وزیر دفاع پاکستان ایئر فورس ایکٹ اور پاکستان نیوی آرڈیننس میں ترامیم کے بل بھی منظوری کے لیے پیش کریں گے۔ اس کے علاوہ وزیر قانون اعظم نذیر تارڑ سپریم کورٹ پریکٹس اینڈ پروسیجر ترمیمی بل بھی ایوان میں رکھیں گے۔

واضح رہے کہ قومی اسمبلی ان تمام بلوں کی منظوری گزشتہ روز پہلے ہی دے چکی ہے، جبکہ وزیراعظم شہباز شریف نے اتحادی جماعتوں کا تعاون پر شکریہ ادا کیا۔

یاد رہے کہ 27ویں آئینی ترمیم کے بعد آرمی ایکٹ 2025 بھی منظور کیا جا چکا ہے۔ اس کے مطابق آرمی چیف کو بطور چیف آف ڈیفنس فورسز نیا نوٹیفکیشن جاری کیا جائے گا، جس کے بعد ان کی مدت دوبارہ سے شروع ہو جائے گی۔

ترمیمی ایکٹ میں کہا گیا ہے کہ آرمی چیف، چیف آف ڈیفنس کے طور پر پاک فوج کے تمام شعبوں کی ازسرنو تنظیم و انضمام کریں گے۔ وزیراعظم، آرمی چیف کی سفارش پر کمانڈر نیشنل اسٹریٹیجک کمانڈ تعینات کریں گے۔

آرمی ایکٹ کے مطابق کمانڈر نیشنل اسٹریٹیجک کمانڈ کی مدتِ ملازمت تین سال ہو گی اور اسے مزید تین سال کیلئے دوبارہ تعینات بھی کیا جا سکے گا۔

قانون کے تحت 27 نومبر سے چیئرمین جوائنٹ چیفس آف اسٹاف کمیٹی کا عہدہ ختم ہو جائے گا۔