روزانہ ایک کپ کافی دل کی بے ترتیب دھڑکن اور ہائی بلڈ پریشر میں مفید ثابت

ایک نئی تحقیق میں یہ انکشاف ہوا ہے کہ یومیہ ایک کپ کیفین والی کافی پینے سے دل کی بے ترتیب دھڑکن (ایٹریل فبریلیشن) میں بہتری آ سکتی ہے اور ہائی بلڈ پریشر بھی کم ہو سکتا ہے۔

امریکی ماہرین کے مطابق ایٹریل فبریلیشن کے مریضوں کو عموماً کیفین سے پرہیز کی ہدایت دی جاتی ہے، مگر نئی تحقیق پرانی سوچ کو چیلنج کر رہی ہے۔

 تحقیق میں شامل 200 مریضوں کو دو گروپس میں تقسیم کیا گیا: ایک گروپ کو روزانہ کم از کم ایک کپ کیفین والی کافی پینے کی ہدایت دی گئی جبکہ دوسرے گروپ کو کیفین سے مکمل پرہیز کرنے کو کہا گیا۔

چھ ماہ کے مشاہدے کے بعد نتائج سے معلوم ہوا کہ کافی پینے والے افراد میں دل کی بے ترتیب دھڑکن کا مسئلہ 39 فیصد بہتر ہوا۔

 ماہرین کے مطابق کافی پینے سے نہ صرف دل کی بے ترتیبی میں بہتری آتی ہے بلکہ ہائی بلڈ پریشر بھی کم ہوتا ہے اور توانائی میں اضافہ ہوتا ہے، جس کا مثبت اثر دل کی صحت پر پڑتا ہے۔

یہ تحقیق دی امریکن میڈیکل ایسوسی ایشن میں شائع ہوئی اور یہ پہلا طویل مدتی رینڈمائزڈ کلینیکل ٹرائل ہے جس میں کیفین والی کافی کے اثرات کو سائنسی طور پر جانچا گیا۔