اسلام آباد میں پہلی بار کامیاب روبوٹک سرجری، پیچیدہ آپریشنز اب زیادہ محفوظ

اسلام آباد میں پہلی بار روبوٹک سرجری کامیابی سے انجام دی گئی ہے۔ یہ تاریخی کامیابی پمز اسپتال میں حاصل ہوئی، جہاں جدید ٹو مائی سرجیکل روبوٹ کے ذریعے پیچیدہ آپریشن مکمل کیا گیا۔

سرجری میں برطانیہ کے بین الاقوامی ماہرین نے بھی حصہ لیا جبکہ پمز کے پروفیسر شمیم خان، پروفیسر متین شریف اور ڈاکٹر جاوید برکی نے رہنمائی کی۔

 اس کے علاوہ پمز کے دیگر ماہرین ڈاکٹر عاطف انعام شامی، ڈاکٹر برہان الحق اور ڈاکٹر خالد سعید نے بھی سرجری میں حصہ لیا۔

ایگزیکٹو ڈائریکٹر پمز، ڈاکٹر عمران سکندر نے بتایا کہ روبوٹک سرجری کے ذریعے مریض کو کم سے کم تکلیف ہوتی ہے اور پیچیدہ آپریشن اب زیادہ محفوظ اور مؤثر طریقے سے کیے جا سکتے ہیں۔ 

ان کا کہنا تھا کہ مستقبل میں پمز میں مزید اس طرح کے کامیاب تجربات کیے جائیں گے۔