پیپلز پارٹی آزاد کشمیر میں تحریک عدم اعتماد کے لیے سرگرم، چوہدری یاسین کو ممکنہ نیا قائد ایوان قرار

پیپلز پارٹی آزاد کشمیر کے وزیراعظم چوہدری انوارالحق کے خلاف تحریک عدم اعتماد کے لیے دوبارہ متحرک ہو گئی ہے۔ ذرائع کے مطابق پارٹی قیادت نے اراکین اسمبلی کو فوری طور پر مظفرآباد پہنچنے کی ہدایت کی اور تحریک عدم اعتماد کی قرارداد پر دستخط کروائے گئے ہیں۔

نئے قائد ایوان کا نام آخری وقت میں لکھا جائے گا، اور پیپلز پارٹی کے صدر چوہدری یاسین کو اس کے لیے پسندیدہ قرار دیا جا رہا ہے۔ وزیراعظم چوہدری انوارالحق نے مستعفی ہونے کی صورت میں کچھ شرائط عائد کر رکھی ہیں۔

ذرائع کے مطابق مسلم لیگ ن بھی تحریک عدم اعتماد میں پیپلز پارٹی کے ساتھ تعاون کرے گی اور تحریک آج جمع کرانے کا امکان ہے۔

 پاکستان میں آئینی ترمیم کی وجہ سے تحریک عدم اعتماد میں پہلے تاخیر ہوئی تھی۔ پیپلز پارٹی کا دعویٰ ہے کہ اسمبلی میں 36 سے زائد اراکین ان کے ساتھ ہیں، جبکہ سادہ اکثریت کے لیے صرف 27 ووٹ درکار ہیں۔