کوہاٹ اور کرک میں پولیس کارروائیاں، 4 دہشت گرد ہلاک

خیبر پختونخوا کے اضلاع کوہاٹ اور کرک میں پولیس کی دو الگ کارروائیوں کے دوران مجموعی طور پر 4 دہشت گرد مارے گئے۔

کوہاٹ کے علاقے بازید خیل کے قریب پولیس گشت کے دوران دہشت گردوں نے تھانہ صدر کے ایس ایچ او ریاض اور اُن کی ٹیم پر اچانک فائرنگ کردی۔

ڈی پی او شہباز الٰہی کے مطابق پولیس نے فوری جوابی کارروائی کی، جس میں تین دہشت گرد موقع پر ہی ہلاک ہوگئے۔ لاشوں کو قریبی اسپتال منتقل کردیا گیا جبکہ دہشت گردوں کے نیٹ ورک سے متعلق تحقیقات جاری ہیں۔

دوسری جانب کرک کے علاقے میر کلام بانڈہ میں پولیس اور دہشت گردوں کے درمیان مقابلہ ہوا۔ فائرنگ کے تبادلے میں ایک دہشت گرد مارا گیا۔

ترجمان سی ٹی ڈی کے مطابق ہلاک دہشت گرد متعدد سنگین مقدمات میں مطلوب تھا۔