فیفا اور بورڈ آف پیس نے غزہ کی تعمیر نو کے لیے تاریخی تعاون کا معاہدہ کیا

واشنگٹن: عالمی فٹبال تنظیم فیفا اور بورڈ آف پیس نے غزہ کی تعمیر نو اور جنگ سے متاثرہ علاقوں کی بحالی کے لیے فٹبال کے ذریعے سرمایہ کاری کو فروغ دینے کے مقصد سے اہم شراکت داری کا معاہدہ کر لیا۔

یہ معاہدہ واشنگٹن میں بورڈ آف پیس کے افتتاحی اجلاس کے دوران طے پایا، جس کا بنیادی مقصد عالمی رہنماؤں اور اداروں سے مالی معاونت حاصل کر کے غزہ کی بحالی کو ممکن بنانا ہے۔ 

بورڈ آف پیس کا قیام امریکی صدر ڈونلڈ ٹرمپ کے تحت عمل میں آیا تھا۔

فیفا کے صدر جیانی انفانٹینو نے کہا کہ یہ معاہدہ تنازعات سے متاثرہ علاقوں میں فٹبال کو روزگار، ترقی اور سماجی بہتری کے مؤثر ذریعہ کے طور پر استعمال کرنے میں مدد دے گا۔

معاہدے کے تحت غزہ میں اسکولوں اور رہائشی علاقوں کے قریب 50 چھوٹے فٹبال گراؤنڈز، مختلف اضلاع میں 5 بڑے گراؤنڈز، ایک جدید فیفا اکیڈمی اور 20 ہزار نشستوں پر مشتمل قومی اسٹیڈیم تعمیر کیا جائے گا۔ 

مزید برآں، فٹبال سے متعلق منصوبوں کے لیے 75 ملین ڈالر جمع کیے جائیں گے۔

فیفا کے مطابق پروگرام کا مقصد نوجوانوں کو مثبت سرگرمیوں میں شامل کرنا، روزگار کے مواقع پیدا کرنا، لڑکوں اور لڑکیوں کے لیے باقاعدہ لیگز کا انعقاد اور مقامی معیشت کو فروغ دینا ہے۔ 

تاہم ماہرین کا کہنا ہے کہ غزہ میں سکیورٹی صورتحال، تعمیر نو کے اخراجات اور انسانی امداد کی فراہمی اس منصوبے کی کامیابی کے لیے بڑے چیلنجز ہیں۔