دھ کے روز قومی اسمبلی نے 27ویں آئینی ترمیم کی منظوری کے بعد فیصلہ کیا کہ ایوان کو جمعہ کے روز غیر معینہ مدت کے لیے ملتوی کرنے سے قبل بری، بحری اور فضائی افواج کے نئے قواعد و ضوابط سے متعلق قانون سازی پر بحث اور منظوری دی جائے گی۔
یہ قانون سازی آئین کے آرٹیکل 243 میں کی گئی حالیہ ترمیم کے مطابق ہوگی۔ ذرائع کے مطابق ائیر چیف مارشل ظہیر احمد بابر سدھو کو مزید پانچ سال کے لیے دوبارہ تعینات کرنے کا فیصلہ کیا گیا ہے۔
پاکستان آرمی میں بھی جلد ہی دو نئے چار ستارہ جنرلز تعینات ہوں گے، جن میں ایک وائس چیف آف آرمی اسٹاف (VCAS) اور دوسرا کمانڈر نیشنل اسٹریٹیجک کمانڈ کے طور پر خدمات انجام دے گا۔
باوثوق پارلیمانی ذرائع کے مطابق، ترمیم شدہ آئین میں درج ہے کہ وزیرِاعظم، چیف آف آرمی اسٹاف (جو ساتھ ہی چیف آف ڈیفنس فورسز بھی ہوں گے) کی سفارش پر کمانڈر نیشنل اسٹریٹیجک کمانڈ کا تقرر کریں گے۔
چیئرمین جوائنٹ چیفس آف اسٹاف کمیٹی کا عہدہ 27 نومبر 2025 سے ختم کر دیا جائے گا۔ ترمیم کے تحت چیف آف ڈیفنس فورسز، چیف آف ایئر اسٹاف اور چیف آف نیول اسٹاف کے تقرر وزیرِاعظم کی سفارش پر ہوں گے۔
ان افسران کو اگر فیلڈ مارشل، مارشل آف دی ایئر فورس یا ایڈمرل آف دی فلیٹ کے عہدے پر ترقی دی جائے تو وہ اپنی وردی، مراعات اور رتبہ تاحیات برقرار رکھیں گے، جب کہ ان کی آئندہ ذمہ داریاں وفاقی حکومت طے کرے گی۔
ترمیم شدہ آئین کے تحت ان اعلیٰ فوجی عہدوں کو آئینی تحفظ حاصل ہوگا اور انہیں صرف آئین کے آرٹیکل 47 کے مطابق ہی ہٹایا جا سکے گا۔ آرٹیکل 248 کے تحت صدرِ مملکت کو حاصل استثنا اب ان افسران تک بھی بڑھا دیا گیا ہے۔
ذرائع کے مطابق، نئی آئینی ترمیم کے بعد پارلیمنٹ کے ایکٹ کے ذریعے مزید قانون سازی کی جائے گی تاکہ تینوں افواج کے نظام میں عملی تقاضے پورے کیے جا سکیں۔
مزید یہ کہ، ذرائع نے بتایا کہ مئی 2025 میں بھارت کے ساتھ جنگ میں ائیر چیف مارشل ظہیر احمد بابر سدھو کی شاندار قیادت کے باعث — جس میں پاک فضائیہ نے بھارت کے سات جدید ترین جنگی طیارے مار گرائے اور آٹھویں کو شدید نقصان پہنچایا —
انہیں مارشل آف دی ایئر فورس کا اعزازی درجہ دینے کی تجویز زیر غور ہے۔
وہ اس اعزاز کے حامل پہلے ائیر چیف ہوں گے۔ دونوں نئے چار ستارہ جنرلز چیف آف ڈیفنس فورسز، فیلڈ مارشل سید عاصم منیر کے ماتحت ہوں گے۔
Islamabad
دیکھیں
