اسلام آباد جوڈیشل کمپلیکس دوبارہ کھول دیا گیا، سیکیورٹی سخت، وکلا کی ہڑتال جاری

اسلام آباد کچہری میں خودکش دھماکے کے دو روز بعد فیڈرل جوڈیشل کمپلیکس کو آج سخت سیکیورٹی کے ساتھ کھول دیا گیا ہے۔

وکلاء اور سائلین کی بڑی تعداد عدالت پہنچ گئی ہے۔ وکلاء کے کلرکس کو صرف آفیشل کارڈ دکھانے پر اندر جانے کی اجازت دی جا رہی ہے، جبکہ سائلین کو تلاشی اور تفصیلات درج کروانے کے بعد داخل ہونے دیا جا رہا ہے۔

خودکش دھماکے کی تحقیقات جاری ہیں اور سیکیورٹی اداروں نے جائے وقوعہ سے تمام شواہد جمع کر لیے ہیں۔

دوسری جانب اسلام آباد جوڈیشل کمپلیکس کے باہر ہونے والے خودکش حملے کا مقدمہ درج کر لیا گیا ہے، جبکہ بار ایسوسی ایشن نے آج اور کل عدالتی کارروائی کے بائیکاٹ اور ہڑتال کا اعلان کر رکھا ہے۔

واضح رہے کہ دو روز قبل جی الیون کے علاقے میں کچہری کے باہر پولیس کی گاڑی پر خودکش دھماکے میں 12 افراد شہید اور 38 زخمی ہوئے تھے، جبکہ جائے وقوعہ سے خودکش حملہ آور کا سر بھی برآمد ہوا تھا۔