وفاقی آئینی عدالت نے اسلام آباد ہائی کورٹ کے پانچ ججز کی درخواست مسترد کر دی

وفاقی آئینی عدالت نے ججز ٹرانسفر کیس میں اسلام آباد ہائی کورٹ کے پانچ ججز کی سپریم کورٹ میں درخواست واپس بھیجنے کی استدعا مسترد کر دی۔

درخواست اسلام آباد ہائی کورٹ کے جسٹس محسن اختر کیانی، جسٹس بابر ستار، جسٹس طارق جہانگیری، جسٹس اعجاز اسحاق خان اور جسٹس ثمن رفعت امتیاز کی جانب سے دائر کی گئی تھی، جس میں مؤقف اپنایا گیا کہ ان کی انٹرا کورٹ اپیل کو آئینی عدالت میں منتقل کرنا آئینی طور پر سپریم کورٹ کے دائرہ اختیار میں آتا ہے۔

وفاقی آئینی عدالت نے واضح کیا کہ اسلام آباد ہائی کورٹ کے ججز کی اپیل عدم پیروی کی بنیاد پر مسترد کی جاتی ہے۔

یہ کیس دیگر ہائی کورٹس کے تین ججز کے وفاقی دارالحکومت میں تبادلے سے متعلق تھا، جس پر جون میں سپریم کورٹ نے تبادلے کو غیر آئینی قرار نہیں دیا تھا۔

 آئینی عدالت نے اسلام آباد ہائی کورٹ کے ججز اور دیگر انٹرا کورٹ اپیلیں مسترد کرتے ہوئے سپریم کورٹ کے فیصلہ کو برقرار رکھا۔ سپریم کورٹ کے پانچ رکنی بینچ نے آرٹیکل 200 کے تحت ججز کے تبادلے کو کثرت رائے سے درست قرار دیا تھا۔

اسی طرح لاہور ہائی کورٹ بار، بانی تحریک انصاف اور دیگر کے انٹرا کورٹ اپیلیں بھی عدم پیروی کی بنیاد پر خارج کر دی گئیں۔

 وفاقی آئینی عدالت نے بانی تحریک انصاف سے ملاقات یا ہدایات حاصل کرنے کی درخواست بھی مسترد کر دی۔ چیف جسٹس امین الدین خان نے واضح کیا کہ عدالت ایسے آرڈر جاری نہیں کر سکتی اور ملاقات کے لیے رجوع وہیں کریں جہاں سزا ہوئی۔