ٹی 20 ورلڈ کپ 2026 کا شیڈول آج ممبئی میں اعلان کیا جائے گا، پاکستان اور بھارت ایک گروپ میں

انٹرنیشنل کرکٹ کونسل (آئی سی سی) آج ممبئی میں ٹی 20 ورلڈ کپ 2026 کا مکمل شیڈول جاری کرے گی۔

 یہ عالمی ایونٹ 7 فروری سے 8 مارچ تک کھیلا جائے گا اور بھارت اور سری لنکا مشترکہ میزبان ہوں گے۔

ذرائع کے مطابق، 20 ٹیموں کو چار گروپس میں تقسیم کیا گیا ہے۔ ہر گروپ کی ٹاپ 2 ٹیمیں سپر ایٹ مرحلے کے لیے کوالیفائی کریں گی، جبکہ سپر ایٹ میں 8 ٹیموں کو دو گروپس میں تقسیم کیا جائے گا اور دونوں گروپس کی ٹاپ 2 ٹیمیں سیمی فائنل کے لیے آگے بڑھیں گی۔

پاکستان اور بھارت ایک ہی گروپ میں ہیں، جس میں امریکا، نمیبیا اور نیدرلینڈز کی ٹیمیں بھی شامل ہیں۔ دونوں ٹیموں کا ٹاکرا 15 فروری کو کولمبو میں ہوگا۔ پاکستان اپنے تمام میچز سری لنکا میں کھیلے گا۔

دوسرے گروپس میں سری لنکا، آسٹریلیا، زمبابوے، آئر لینڈ اور عمان؛ انگلینڈ، ویسٹ انڈیز، بنگلا دیش، نیپال اور اٹلی؛ اور ساؤتھ افریقہ، نیوزی لینڈ، افغانستان، یو اے ای اور کینیڈا شامل ہیں۔

بھارت میں میچز کولکتہ، چنئی، دہلی اور احمد آباد میں ہوں گے، جبکہ سری لنکا میں کولمبو اور کینڈی میں میچز کھیلے جائیں گے۔

 فائنل کے لیے احمد آباد کو منتخب کیا گیا ہے، لیکن اگر پاکستان فائنل میں پہنچتا ہے تو یہ کولمبو میں ہوگا۔ سیمی فائنلز ممبئی اور کولکتہ میں ہوں گے، تاہم پاکستان کے پہنچنے کی صورت میں ایک سیمی فائنل کولمبو میں کھیلا جائے گا۔