وفاقی وزیر داخلہ محسن نقوی نے کہا ہے کہ ویزا اور ایجنٹ مافیا لالچِ زر میں معصوم لوگوں کے مستقبل سے کھیل رہا ہے اور ملک کی ساکھ کو نقصان پہنچا رہا ہے۔ انہوں نے واضح کیا کہ جعلی وعدوں پر بیرونِ ملک بھیجنے والے ایجنٹس کے خلاف سخت کارروائی کی جائے گی اور کسی کو رعایت نہیں دی جائے گی۔
وزیر داخلہ نے اسلام آباد انٹرنیشنل ایئرپورٹ کا دو گھنٹے طویل اچانک دورہ کیا، جہاں انہوں نے امیگریشن عمل، اہلکاروں کی موجودگی اور مسافروں کو درپیش مسائل کا تفصیلی جائزہ لیا۔ اس دوران انہوں نے بیرونِ ملک سفر کرنے والے مسافروں سے براہِ راست گفتگو کرکے ان کی شکایات بھی سنیں۔
محسن نقوی نے 7 نومبر کو ایک مسافر کی امیگریشن پر کم عملے کی شکایت کا سخت نوٹس لیتے ہوئے فوری انکوائری کا حکم دیا اور ہدایت کی کہ صورتحال کا سی سی ٹی وی فوٹیج کے ذریعے باریک بینی سے جائزہ لیا جائے۔ انہوں نے یقین دہانی کرائی کہ آئندہ ایسے مسائل دوبارہ پیدا نہیں ہونے دیے جائیں گے۔
انہوں نے ہدایت دی کہ مکمل سفری دستاویزات رکھنے والے افراد کو بلاجواز نہ روکا جائے، تاہم جعلی کاغذات اور غیر قانونی ذرائع سے بیرونِ ملک جانے والوں کے خلاف سخت کارروائی کی جائے، کیونکہ ایسے مسافر ملک کی بدنامی کا سبب بنتے ہیں۔
وزیر داخلہ نے ایجنٹ مافیا کے خلاف بھرپور کریک ڈاؤن کا اعلان کرتے ہوئے کہا کہ روزگار کا جھانسہ دے کر لوگوں کو دھوکا دینے والے عناصر کسی رحم کے مستحق نہیں۔ انہوں نے تمام متعلقہ اداروں کو ہدایت کی کہ ایئرپورٹ امیگریشن نظام کو مزید مؤثر، شفاف اور مسافر دوست بنایا جائے تاکہ پاکستان کی ساکھ اور مسافروں کا اعتماد برقرار رہے۔
Islamabad
دیکھیں
