امریکا نے شام میں داعش کے ٹھکانوں پر شدید فضائی حملے شروع کر دیے

امریکی فوجیوں کی ہلاکت کے جواب میں امریکا نے شام میں داعش کے ٹھکانوں کو نشانہ بناتے ہوئے شدید فضائی حملے شروع کر دیے ہیں۔

غیر ملکی میڈیا کے مطابق امریکی لڑاکا طیاروں اور ہیلی کاپٹروں نے وسطی شام میں متعدد اہداف کو کامیابی سے نشانہ بنایا۔

 امریکی وزیرِ دفاع پیٹ ہیگسیتھ نے کہا کہ "آپریشن ہاک آئی سٹرائیک" کا مقصد داعش کے بنیادی ڈھانچے اور ہتھیاروں کی تنصیبات کو ختم کرنا تھا۔

واضح رہے کہ گزشتہ ہفتے شام کے تاریخی شہر تدمر (پالمیرا) کے قریب مشترکہ گشت کے دوران امریکی اور شامی افواج پر فائرنگ کے واقعے میں 2 امریکی فوجیوں سمیت 3 امریکی شہری ہلاک ہوئے تھے۔

 امریکی صدر ڈونلڈ ٹرمپ نے شدید ردعمل دینے کا وعدہ کیا تھا۔

فضائی حملوں کے بعد صدر ٹرمپ نے سوشل میڈیا پلیٹ فارم ٹروتھ سوشل پر بتایا کہ داعش کے ٹھکانوں پر بھرپور حملے جاری ہیں اور شام کی حکومت امریکی کارروائیوں کی مکمل حمایت کر رہی ہے۔

 شامی حکومت نے بھی داعش کے خلاف فوجی آپریشنز جاری رکھنے کا اعلان کیا ہے۔