بھارت کا اعتراف: بنگلادیش کی نوجوان نسل بھارت سے بدظن، پاکستان اور چین کا اثر بڑھ گیا

بھارتی وزارتِ خارجہ نے تسلیم کیا ہے کہ بنگلادیش کی نوجوان نسل بھارت کو شک کی نگاہ سے دیکھتی ہے اور دونوں ممالک کے تعلقات ایک نازک مرحلے میں داخل ہو چکے ہیں۔

بھارتی وزارتِ خارجہ کی پارلیمانی کمیٹی کی رپورٹ کے مطابق بنگلادیشی نوجوان بھارت سے ناخوش ہیں، جبکہ ڈھاکا میں پاکستان اور چین کا اثر و رسوخ نمایاں طور پر بڑھ چکا ہے۔

 رپورٹ میں خبردار کیا گیا ہے کہ اگر بھارت نے اپنی خارجہ پالیسیوں میں بروقت اصلاح نہ کی تو وہ بنگلادیش میں غیر مؤثر اور غیر متعلق ہو سکتا ہے۔

رپورٹ میں یہ بھی کہا گیا ہے کہ بنگلادیش میں عوامی لیگ کا سیاسی اثر کمزور ہو چکا ہے اور نئی نسل بنگلادیش کے قیام میں بھارت کے کردار کو تنقیدی نظر سے دیکھ رہی ہے۔

 بھارتی وزارتِ خارجہ کے مطابق یہ تمام عوامل حالات کو ایک نئے موڑ پر لے آئے ہیں، جس کے نتیجے میں بھارت کو 1971 کے بعد بنگلادیش میں سب سے بڑے اسٹریٹجک بحران کا سامنا ہے۔