خیبر پختونخوا پولیس کی استعداد بڑھانے کا فیصلہ، جدید اسلحہ، ڈرونز اور بکتر بند گاڑیاں خریدی جائیں گی

خیبر پختونخوا پولیس نے سیکیورٹی چیلنجز سے مؤثر انداز میں نمٹنے کے لیے مزید جدید اسلحہ اور آلات خریدنے کا فیصلہ کر لیا ہے۔ 

سرکاری دستاویزات کے مطابق پولیس فورس کے لیے 50 بیریٹا سنائپر رائفلز، 100 دیگر سنائپر رائفلز اور 1250 جدید خودکار ’ٹی ڈبلیو ایس‘ ہتھیار حاصل کیے جائیں گے۔

دستاویز میں بتایا گیا ہے کہ 430 تھرمل بائنیکیولرز، 330 تھرمل ٹی آئی کیمرے اور 73 جدید سرویلنس ڈرونز بھی خریدے جائیں گے۔

 اس کے علاوہ ڈرون سے پیدا ہونے والے خطرات سے نمٹنے کے لیے 14 مزید اینٹی ڈرون گنز شامل کی جائیں گی جبکہ 4 سرچنگ ڈرونز بھی فورس کا حصہ بنیں گے۔

دہشت گردی کے خلاف کارروائیوں کو مزید محفوظ بنانے کے لیے 20 جدید بم ڈسپوزل سوٹس فراہم کیے جائیں گے۔ 

سرچ آپریشنز کے دوران نگرانی کے لیے ایک ہزار اسپارٹا کیمرے، جبکہ اہلکاروں کے تحفظ کے لیے 6 ہزار بلٹ پروف جیکٹس اور 6 ہزار بلٹ پروف ہیلمٹس خریدنے کا بھی فیصلہ کیا گیا ہے۔

دستاویز کے مطابق 39 پولیس گاڑیوں کی فرنٹ اسکرین اور 5 ڈبل کیبن گاڑیوں کی بلٹ پروفنگ کی جائے گی۔ 

مزید برآں، 210 بی سیون لیول بکتر بند گاڑیاں، 1200 آپریشنل بکتر بند گاڑیاں، اور پولیس گاڑیوں کی سائیڈ آرمَرنگ و باڈی فیبریکیشن کے اقدامات بھی شامل ہیں۔