افغان ڈیٹا لیک اسکینڈل: برطانوی حکومت کا وزارتِ دفاع کے ذمہ داران کے خلاف سخت ایکشن

افغان ڈیٹا لیک اسکینڈل کے معاملے پر برطانوی حکومت نے وزارتِ دفاع کے متعلقہ ذمہ داران کے خلاف کارروائی شروع کر دی ہے۔

 غیر ملکی خبر رساں ادارے کے مطابق ایک برطانوی قانونی فرم نے تقریباً 1200 متاثرہ افراد کی جانب سے حکومت کے خلاف قانونی چارہ جوئی کا آغاز کر دیا ہے۔

رپورٹ کے مطابق ہر متاثرہ فرد کو ڈھائی لاکھ پاؤنڈ تک معاوضہ ملنے کا امکان ظاہر کیا جا رہا ہے۔ 

بتایا گیا ہے کہ یہ تمام متاثرین افغان جنگ کے دوران برطانوی افواج کے شانہ بشانہ خدمات انجام دے چکے ہیں اور ڈیٹا لیک ہونے کے باعث انہیں سنگین سیکیورٹی خطرات کا سامنا کرنا پڑا۔

برطانوی حکام کے مطابق متاثرین کی خدمات کے اعتراف اور ان کی جان کو لاحق خطرات کے پیش نظر معاوضہ فراہم کیا جائے گا، جبکہ ذمہ دار افسران کے خلاف احتسابی کارروائی بھی جاری ہے۔