امریکا کا وینزویلا کے قریب ایک اور تیل بردار جہاز ضبط، دباؤ میں مزید اضافہ

امریکی فورسز نے وینزویلا کے ساحلی علاقے کے قریب ایک اور تیل بردار جہاز کو اپنی تحویل میں لے لیا ہے۔

 غیر ملکی خبر ایجنسی کے مطابق یہ کارروائی ہفتے کے روز اس وقت عمل میں آئی جب امریکی صدر ڈونلڈ ٹرمپ کی جانب سے وینزویلا آنے اور جانے والے پابندیوں کی زد میں موجود تمام تیل بردار جہازوں کے خلاف ناکہ بندی کے اعلان کو چند ہی دن گزرے تھے۔

یہ اقدام ایسے وقت میں سامنے آیا ہے جب امریکا وینزویلا کے صدر نکولس مادورو پر دباؤ بڑھا رہا ہے اور خطے میں امریکی فوجی موجودگی میں بھی نمایاں اضافہ کیا جا چکا ہے۔

 وینزویلا کی جانب سے اس تازہ کارروائی پر تاحال کوئی باضابطہ ردعمل سامنے نہیں آیا، تاہم ماضی میں وینزویلا امریکا پر اپنے تیل کے وسائل پر قبضے کی کوششوں کا الزام عائد کرتا رہا ہے۔

قابلِ ذکر ہے کہ حالیہ ہفتوں میں یہ دوسرا موقع ہے جب امریکا نے وینزویلا کے قریب کسی تیل بردار جہاز کو ضبط کیا ہے، اس سے قبل بھی ایک ایسا ہی واقعہ پیش آ چکا ہے۔