فیلڈ مارشل عاصم منیر کی سعودی وزیر دفاع سے ملاقات، علاقائی امن اور انسداد دہشت گردی تعاون پر اتفاق

چیف آف ڈیفنس فورسز فیلڈ مارشل سید عاصم منیر نے سعودی عرب کے سرکاری دورے کے دوران سعودی وزیرِ دفاع شہزادہ خالد بن سلمان سے ملاقات کی، جس میں علاقائی سلامتی، دفاعی تعاون اور انسداد دہشت گردی کے مشترکہ اقدامات پر تفصیلی تبادلہ خیال کیا گیا۔

آئی ایس پی آر کے مطابق ملاقات میں بدلتی ہوئی جغرافیائی و سیاسی صورتحال، اسٹریٹجک شراکت داری اور دفاعی و عسکری روابط کو مزید مضبوط بنانے پر زور دیا گیا۔ اس ملاقات نے پاکستان اور سعودی عرب کے دیرینہ، برادرانہ اور تاریخی تعلقات کی ایک بار پھر توثیق کی۔

اس موقع پر خادمِ حرمین شریفین شاہ سلمان بن عبدالعزیز آل سعود کے شاہی فرمان کے تحت فیلڈ مارشل سید عاصم منیر کو سعودی عرب کے اعلیٰ ترین قومی اعزاز کنگ عبدالعزیز میڈل سے نوازا گیا۔

یہ اعزاز فیلڈ مارشل عاصم منیر کی نمایاں عسکری قیادت، پاکستان اور سعودی عرب کے درمیان دفاعی تعاون، اسٹریٹجک ہم آہنگی اور انسداد دہشت گردی کے شعبے میں ان کے کلیدی کردار کے اعتراف میں دیا گیا۔

فیلڈ مارشل عاصم منیر نے اعزاز پر سعودی قیادت کا شکریہ ادا کرتے ہوئے اسے دونوں برادر ممالک کے مضبوط اور پائیدار تعلقات کی علامت قرار دیا اور سعودی عرب کی سلامتی و استحکام کے لیے پاکستان کے غیر متزلزل عزم کا اعادہ کیا۔