لاہور میں شدید دھند کے دوران بوندا باندی، سردی کی شدت میں مزید اضافہ

پنجاب کے صوبائی دارالحکومت لاہور میں شدید دھند کی صورتحال کے دوران شہر کے مختلف علاقوں میں بوندا باندی کا سلسلہ شروع ہو گیا ہے، جس کے باعث موسم مزید سرد ہو گیا اور سردی کی شدت میں نمایاں اضافہ محسوس کیا جا رہا ہے۔

ایبٹ روڈ، گڑھی شاہو، مغلپورہ، شاد باغ، ٹھوکر نیاز بیگ، ملتان روڈ، شاہ پور کانجراں اور چوہنگ سمیت مختلف علاقوں میں ہلکی بارش ریکارڈ کی گئی، جس سے سرد موسم نے مزید شدت اختیار کر لی۔

بوندا باندی کے باعث شہر میں حدِ نگاہ میں کمی دیکھی گئی جبکہ سڑکیں پھسلن کا شکار ہو گئیں، جس سے ٹریفک کی روانی بھی متاثر ہونے کا خدشہ ہے۔

محکمہ موسمیات کے مطابق لاہور میں کم سے کم درجہ حرارت 11 ڈگری سینٹی گریڈ تک رہنے کا امکان ہے جبکہ زیادہ سے زیادہ درجہ حرارت 21 ڈگری سینٹی گریڈ تک جا سکتا ہے۔