پنجاب اسمبلی: فلم انڈسٹری کے فروغ کے لیے پنجاب فلم ڈویلپمنٹ اتھارٹی بنانے کا فیصلہ

پنجاب میں فلم سازی، ڈرامہ اور ڈاکیومنٹریز کے فروغ کے لیے پنجاب فلم ڈویلپمنٹ اتھارٹی تشکیل دینے کا فیصلہ کیا گیا ہے۔

 پنجاب اسمبلی میں پیش کیے گئے پنجاب فلم ڈویلپمنٹ اتھارٹی ایکٹ 2025 کے تحت فلم پالیسی، قواعد و ضوابط اور لائسنسنگ کے جامع نظام متعارف کروائے جائیں گے۔

اتھارٹی فلم سازوں کو سہولیات، اجازت نامے اور ون ونڈو آپریشن کی سہولت فراہم کرے گی۔

 بل میں مقامی اور غیر ملکی سرمایہ کاری کے فروغ، فلم سٹوڈیوز، فلم سٹی اور پوسٹ پروڈکشن سہولیات کے قیام کے لیے شقیں شامل ہیں۔ نئے ٹیلنٹ کی تربیت کے لیے ٹریننگ پروگرامز، فنڈنگ، گرانٹس اور سبسڈی کا نظام بھی متعارف ہوگا۔

اتھارٹی پنجاب کی ثقافت، سیاحت اور مثبت تشخص کو اجاگر کرنے کے لیے فلم کے استعمال کو فروغ دے گی اور فلم انڈسٹری سے متعلق شکایات اور مسائل کے حل کا اختیار بھی رکھے گی۔

 بل کو دو ماہ کے لیے متعلقہ کمیٹی کے سپرد کیا گیا ہے، جس کی منظوری کے بعد اسے پنجاب اسمبلی اور پھر گورنر پنجاب سے حتمی منظوری دی جائے گی۔