بلوچستان میں اینٹی نارکوٹکس فورس کی کارروائی: 3 کروڑ 26 لاکھ روپے مالیت کی منشیات ضبط، ایک ملزم گرفتار

اینٹی نارکوٹکس فورس (اے این ایف) نے بلوچستان کے ضلع کیچ میں ایک بڑی کارروائی کرتے ہوئے منشیات کی سمگلنگ ناکام بنا دی۔ 

خفیہ اطلاعات کی بنیاد پر سیٹلائٹ ٹاؤن کے قریب پنجگور سے تربت کی جانب لے جائی جانے والی منشیات کو ضبط کیا گیا۔

اے این ایف کے مطابق برآمد شدہ منشیات میں 99 کلو آئس، 50 کلو افیون اور 73 کلوگرام چرس شامل تھی، جس کی مجموعی مالیت تقریباً 3 کروڑ 26 لاکھ روپے بنتی ہے۔

 کارروائی کے دوران ایک گاڑی کی تلاشی کے دوران پلاسٹک کے کینز میں چھپائی گئی منشیات پکڑی گئی۔

اس کامیاب کارروائی میں ایک ملزم کو گرفتار کر کے مزید قانونی کارروائی کے لیے پولیس سٹیشن منتقل کر دیا گیا۔

 ذرائع نے بتایا کہ منشیات سمگلنگ کے پورے نیٹ ورک کا سراغ لگانے اور اسے بے نقاب کرنے کے لیے این ایف ٹیم کی کوششیں جاری ہیں۔ 

مسلسل نگرانی، بروقت خفیہ معلومات اور مؤثر کارروائیوں سے اے این ایف منشیات کی ترسیل کی کوششوں کو ناکام بنا رہا ہے۔