سڈنی بونڈی بیچ حملہ: بھارتی نژاد باپ بیٹے نے آسٹریلیا میں حاصل کی ٹریننگ، داعش کے جھنڈے کے سامنے ویڈیو بھی وائرل

آسٹریلیا کے شہر سڈنی کے بونڈی بیچ پر دہشتگردانہ حملے کے ملزمان ساجد اکرم اور ان کے بیٹے نوید اکرم نے حملے کی ٹیکٹیکل ٹریننگ آسٹریلیا میں ہی حاصل کی تھی۔

آسٹریلوی پولیس نے تحقیقات کے دوران عدالت میں دستاویزات جمع کرائیں، جن سے پتہ چلا کہ ملزمان نے حملے سے ایک دن قبل بونڈی بیچ کا دورہ بھی کیا اور ایک حملہ آور کے فون سے ملی ویڈیو میں دونوں داعش کے جھنڈے کے سامنے بیٹھے نظر آئے۔ 

ویڈیو اکتوبر میں ریکارڈ کی گئی تھی اور اس میں ملزمان نے یہودیوں کے خلاف جذبات کا اظہار کیا۔

میڈیا رپورٹس کے مطابق زخمی ملزم نوید اکرم کو اسپتال سے آج جیل منتقل کر دیا گیا ہے۔

 آسٹریلوی وزیراعظم انتھونی البانیز نے پارلیمنٹ سے انتہا پسندی اور نفرت انگیز بیانات کے خلاف نئے قوانین کی مکمل حمایت کا مطالبہ کر دیا۔

یاد رہے کہ گزشتہ ہفتے بونڈی بیچ پر یہودی تہوار کے شرکا پر فائرنگ کے نتیجے میں 15 افراد ہلاک ہوئے تھے، حملہ آور باپ ساجد اکرم موقع پر ہلاک ہو گیا جبکہ بیٹا نوید زخمی ہوا تھا۔