انڈر 19 ایشیا کپ فائنل میں بھارتی کھلاڑیوں کا رویہ کھیل کے تقاضوں کے مطابق نہیں تھا: سرفراز احمد

قومی انڈر 19 کرکٹ ٹیم کے مینٹور اور سابق کپتان سرفراز احمد نے کہا ہے کہ ایشیا کپ فائنل کے دوران بھارتی کھلاڑیوں کا رویہ اسپورٹس مین اسپرٹ کے منافی تھا اور کھیل کی روایات کے مطابق نہیں تھا۔

انڈر 19 ایشیا کپ میں شاندار کامیابی کے بعد اسلام آباد میں قومی انڈر 19 ٹیم کے کوچز، مینٹور اور کھلاڑیوں نے مشترکہ پریس کانفرنس کی۔

 اس موقع پر ٹیم کے مینٹور سرفراز احمد نے فائنل میچ میں بھارتی ٹیم کے طرزِ عمل پر تنقید کی۔

پریس کانفرنس سے خطاب کرتے ہوئے ہیڈ کوچ شاہد انور نے کہا کہ ایشیا کپ کے لیے ٹیم نے بھرپور اور منظم تیاری کی تھی، کھلاڑیوں نے طے شدہ حکمتِ عملی کے مطابق کرکٹ کھیلی جس کا نتیجہ بڑی کامیابی کی صورت میں سامنے آیا۔

سرفراز احمد نے بتایا کہ وزیراعظم کی جانب سے کھلاڑیوں کے لیے فی کس ایک کروڑ روپے کے انعام کا اعلان نوجوان کرکٹرز کے لیے ایک بڑی حوصلہ افزائی ہے۔

انہوں نے کہا کہ بھارت کو شکست دے کر کھلاڑیوں نے قوم کا سر فخر سے بلند کیا، فائنل میں سمیر منہاس کی اننگز شاندار رہی جبکہ ٹیم کے دیگر کھلاڑیوں نے بھی مجموعی طور پر عمدہ کارکردگی دکھائی۔

سرفراز احمد کا کہنا تھا کہ ورلڈ کپ سے قبل اس کامیابی نے ٹیم کے اعتماد میں نمایاں اضافہ کیا ہے۔

 بھارتی ٹیم کے حوالے سے بات کرتے ہوئے انہوں نے کہا کہ میں نے اپنے کھلاڑیوں کو سختی سے ہدایت دی تھی کہ وہ ہر صورت اسپورٹس مین اسپرٹ کا مظاہرہ کریں۔

اس موقع پر ٹیم کے کپتان فرحان یوسف نے کہا کہ ٹیم مینجمنٹ کی مکمل سپورٹ کے باعث میدان میں بہترین نتائج حاصل ہوئے، ورلڈ کپ سے قبل ٹیم اپنی خامیوں پر مزید کام کرے گی۔

فائنل میں نمایاں بیٹنگ کرنے والے سمیر منہاس نے کہا کہ ٹیم نے پورے ٹورنامنٹ میں بے خوف کرکٹ کھیلنے کا فیصلہ کیا تھا اور یہی حکمتِ عملی کامیابی کی بنیاد بنی۔

واضح رہے کہ پاکستان نے آئی سی سی اکیڈمی گراؤنڈ دبئی میں کھیلے گئے انڈر 19 ایشیا کپ کے فائنل میں بھارت کو 191 رنز کے بھاری مارجن سے شکست دے کر ٹائٹل اپنے نام کیا تھا۔