انگلینڈ میں ریزیڈنٹ ڈاکٹروں کی 5 روزہ ہڑتال ختم، طبی عملہ دوبارہ ڈیوٹی پر واپس

انگلینڈ میں ریزیڈنٹ ڈاکٹروں نے پانچ روزہ ہڑتال ختم ہونے کے بعد دوبارہ کام سنبھال لیا ہے۔ شدید فلو سیزن کے باوجود حکومت گزشتہ ہفتے ہڑتال مؤخر کرانے میں ناکام رہی تھی۔

برٹش میڈیکل ایسوی ایشن کے رہنما ڈاکٹر جیک فلیچر کا کہنا ہے کہ کم تنخواہوں اور نامناسب رویے کے باعث بڑی تعداد میں ڈاکٹر بہتر مواقع کی تلاش میں دوسرے ممالک منتقل ہو رہے ہیں۔

دوسری جانب ہیلتھ سیکریٹری ویس اسٹریٹنگ نے امید ظاہر کی ہے کہ نئے سال میں حکومت اور ڈاکٹروں کے درمیان جاری تنازع کا حل نکل آئے گا۔

ریزیڈنٹ ڈاکٹروں کا مطالبہ ہے کہ حکومت تنخواہوں میں اضافے کے لیے طویل المدتی پالیسی بنائے، اسپیشلسٹ بننے کے لیے بہتر تربیتی مواقع فراہم کرے اور جاب سیکیورٹی کو یقینی بنائے۔

برٹش میڈیکل ایسوی ایشن کے مطابق مارچ 2023 سے اب تک برطانوی ڈاکٹرز 14 مرتبہ ہڑتال کر چکے ہیں، جن میں تقریباً 65 فیصد ڈاکٹروں نے شرکت کی۔

ڈاکٹروں کی یونین کا مؤقف ہے کہ 2008 کے مقابلے میں ان کی حقیقی تنخواہیں نمایاں طور پر کم ہو چکی ہیں، اگرچہ رواں برس ریزیڈنٹ ڈاکٹروں کی تنخواہوں میں 4 سے 5 فیصد اضافہ کیا گیا۔

طبی ماہرین کے مطابق ہڑتال کے اثرات نئے سال کے دوران اور اس کے بعد بھی محسوس کیے جائیں گے۔ گزشتہ ہفتے وزیراعظم سر کیئر اسٹارمر نے ہڑتال کو خطرناک اور غیر ذمہ دارانہ قرار دیا تھا، جبکہ مستقبل میں مزید ہڑتالوں کے امکانات کو بھی رد نہیں کیا جا سکتا۔