پی آئی اے کی نجکاری آج متوقع، 75 فیصد حصص کے لیے بولی کا عمل مکمل کیا جائے گا

قومی ایئرلائن پی آئی اے کی نجکاری کا اہم مرحلہ آج طے پانے جا رہا ہے، جہاں نجکاری کمیشن کی جانب سے پی آئی اے کے 75 فیصد حصص کے لیے بولی کا انعقاد کیا جائے گا۔

 بولی دہندگان اپنی سیل شدہ بولیاں صبح 10:30 بجے تک جمع کرائیں گے۔

نجکاری کے عمل میں ریفرنس قیمت کی منظوری نجکاری کمیشن بورڈ اور کابینہ کمیٹی برائے نجکاری دیں گے۔

 دوپہر 3:30 بجے ایک باقاعدہ تقریب کے دوران بولی دہندگان کی موجودگی میں بولیاں کھولی جائیں گی، جہاں ریفرنس قیمت اور موصول ہونے والی بولیوں کا باضابطہ اعلان کیا جائے گا۔

حکام کے مطابق نجکاری کا تمام عمل طے شدہ قواعد و ضوابط کے مطابق مکمل کیا جائے گا۔ 

51 سے 100 فیصد حصص کی فروخت سے حاصل ہونے والی رقم کا 92.5 فیصد پی آئی اے کی بہتری اور ادائیگیوں پر خرچ ہوگا، جبکہ 7.5 فیصد رقم قومی خزانے میں جمع کرائی جائے گی۔

پی آئی اے کی نجکاری کے عمل کی نگرانی کے لیے بین الاقوامی آبزرورز اسلام آباد پہنچ چکے ہیں۔

 ایوی ایشن ماہر تبسم پردیسی کا کہنا ہے کہ پی آئی اے کی کامیاب نجکاری ملکی معیشت کے لیے نہایت اہم ہے اور پاکستان کے بڑے کاروباری گروپس اس حوالے سے واضح بزنس پلان رکھتے ہیں۔