مریم نواز کا پروٹیکشن آف اونرشپ بل کی معطلی پر ردِعمل: عوامی مفاد کو نقصان پہنچے گا

وزیرِ اعلیٰ پنجاب مریم نواز نے پنجاب پروٹیکشن آف اونرشپ آف اِمووبل پراپرٹی بل 2025ء کی معطلی پر ردِعمل ظاہر کرتے ہوئے کہا ہے کہ یہ قانون برسوں اور دہائیوں سے جائیداد کے تنازعات میں پھنسے لاکھوں عوام کی مدد کے لیے بنایا گیا تھا۔

مریم نواز نے کہا کہ عوام کی منتخب اسمبلی نے یہ قانون بنایا تاکہ طاقتور لینڈ مافیا کے چنگل سے عوام کو نجات ملے اور پہلی بار شہریوں کو اپنی زمین اور جائیداد کے تحفظ کی طاقت حاصل ہو۔

 ان کے مطابق قانون کی معطلی سے قبضہ مافیا کو فائدہ پہنچے گا اور مظلوم عوام کو نقصان ہوگا۔

وزیراعلیٰ نے مزید کہا کہ یہ قانون ان کے ذاتی فائدے کے لیے نہیں تھا بلکہ اس کی معطلی سے غریب، بےکس، بیوائیں اور مظلوم متاثر ہوں گے۔

 انہوں نے واضح کیا کہ قانون سازی صوبائی اسمبلی کا آئینی حق ہے اور اسے روکنا عوام کے مفاد کے خلاف ہے۔