انقرہ سے طرابلس جانے والا طیارہ حادثے کا شکار، لیبیا کے آرمی چیف سمیت 5 افراد جاں بحق

ترکیہ کے دارالحکومت انقرہ سے لیبیا کے شہر طرابلس کے لیے روانہ ہونے والا ایک طیارہ حادثے کا شکار ہو کر تباہ ہوگیا، جس کے نتیجے میں لیبیا کے آرمی چیف سمیت عملے کے پانچ افراد جاں بحق ہوگئے۔

ترک وزیر داخلہ کے مطابق طیارہ شام 8 بج کر 10 منٹ پر انقرہ سے روانہ ہوا، تاہم 8 بج کر 52 منٹ پر ایئر ٹریفک کنٹرول سے اس کا رابطہ منقطع ہوگیا۔

 طیارے کی جانب سے حیمانہ کے قریب ہنگامی لینڈنگ کی اطلاع دی گئی، مگر اس کے بعد دوبارہ کوئی رابطہ قائم نہ ہو سکا۔ بعد ازاں ترک میڈیا نے طیارے کے ملبے تک رسائی حاصل ہونے کی تصدیق کر دی۔

ترک میڈیا کے مطابق ایسن بوغا ایئرپورٹ سے اڑان بھرنے کے تقریباً 30 منٹ بعد طیارے میں اچانک تکنیکی خرابی پیدا ہوئی، جس کے بعد پائلٹ نے انقرہ واپس آنے کی کوشش کی، تاہم لینڈنگ سے قبل ہی طیارہ حادثے کا شکار ہوگیا۔

طیارے میں مجموعی طور پر پانچ افراد سوار تھے۔ لیبیا کے وزیراعظم نے تصدیق کی ہے کہ حادثے میں لیبیا کے آرمی چیف لیفٹیننٹ جنرل محمد علی احمد الحداد جاں بحق ہوگئے۔

 ان کے ساتھ بریگیڈیئر جنرل محمود القتاوی، مشیر الاساوی بھی حادثے میں جان کی بازی ہار گئے، جبکہ لیفٹیننٹ جنرل الفطوری بھی طیارے میں سوار تھے۔